Иранскиот министер за надворешни работи, Абас Арагчи, ги предупреди САД против воениот пристап кон кризата со блокираниот Ормуски Теснец

Иранскиот министер за надворешни работи, Абас Арагчи, ги предупреди САД против воениот пристап кон кризата со блокираниот Ормуски Теснец.

„Проектот Слобода е Проект Ќорсокак“, објави Арагчи утрово на Икс, осврнувајќи се на операцијата на американскиот претседател Доналд Трамп за прекин на блокадата на водениот пат.

Настаните во Ормус јасно покажуваат дека нема воено решение за политичка криза, додаде тој.

- Advertisement -

„Додека разговорите напредуваат благодарение на љубезниот труд на Пакистан, САД треба да бидат внимателни да не бидат вовлечени назад во мочуриште од страна на злонамерници. Истото важи и за ОАЕ“, предупреди Арагчи.

Трамп во неделата го најави почетокот на операцијата наречена „Проект Слобода“, чија цел е да им помогнат на заробените трговски бродови да го напуштат Персискиот Залив.

Централната команда на САД вчера соопшти дека американските разурнувачи во Заливот помагаат во напорите за обновување на комерцијалната пловидба и дека два трговски брода под американско знаме поминале низ теснецот.

Корпусот на Исламската револуционерна гарда на Иран (ИРГЦ) соопшти дека истрелале неколку ракети кон американските воени бродови како предупредување. Иран го потврди и нападот врз нафтените капацитети во пристаништето Фуџаира во Обединетите Арапски Емирати. Воен извор цитиран од државните медиуми изјави дека нападот првично не бил планиран, а бил предизвикан од  „нелегалното поминување на американските воени бродови низ Ормускиот Теснец“.

Примирјето меѓу САД и Иран беше договорено на 8 април со посредство на Пакистан, но сега изгледа сè понестабилно. Преговорите досега не дадоа резултати.

Повторното отворање на водниот пат, кој е важен за глобалната трговија со нафта, е една од пречките во преговорите меѓу САД и Иран за решавање на конфликтот, заедно со нуклеарната програма на Иран.