Укинати мерките по тензиите на Блискиот Исток

Воздушниот сообраќај над Обединетите Арапски Емирати повторно е нормализиран, откако беа укинати мерките на претпазливост, соопшти Генералната управа за цивилно воздухопловство на ОАЕ.

Одлуката, како што наведуваат надлежните, е донесена по сеопфатна процена на состојбата и во координација со релевантните институции, додека системите за следење во реално време остануваат активни со цел да се гарантира безбедноста.

Од Управата упатија благодарност до патниците и авиокомпаниите за соработката во периодот кога беа воведени мерките, додавајќи дека техничките и оперативните тимови остануваат подготвени да реагираат на евентуални нови ситуации.

- Advertisement -

„На јавноста ѝ се препорачува да се информира исклучиво преку официјални извори“, се наведува во соопштението.

Ова доаѓа во период на зголемени тензии на Блискиот Исток, по конфликтот меѓу САД, Израел и Иран, кога воздушниот простор над регионот беше под засилени безбедносни мерки.

Во изминатиот период, Емиратите беа изложени на закани од дронови и проектили, при што Техеран ги оправдуваше ваквите потези со присуството на американски воени бази на нивна територија.