Зеленски ја прифаќа секоја локација освен Русија и Белорусија

Володимир Зеленски е подготвен за средба со рускиот претседател Владимир Путин на која било локација, освен во Русија или Белорусија, изјави шефот на украинската дипломатија Андриј Сибиха.

Тој нагласи дека Украина е заинтересирана за ваков состанок со цел да се даде „нов импулс“ на мировните преговори.

„Се обративме до Турција и некои други престолнини… Ако кој било друг главен град, освен оние во Русија и Белорусија, организира таков состанок, ние ќе дојдеме. Тоа е важно за нас“, изјави Сибиха.

- Advertisement -

Минатата недела тој посочи дека Зеленски е подготвен да се сретне со Путин во Турција, со учество на турскиот претседател Реџеп Тајип Ердоган и американскиот претседател Доналд Трамп. Ердоган претходно ја потврди својата подготвеност да биде домаќин на нова рунда разговори за прекин на руско-украинската војна.

Во меѓувреме, Зеленски изрази надеж дека САД може да помогнат во завршување на конфликтот и го повика Вашингтон да изврши притисок врз Москва. Сепак, тој посочи дека вниманието на администрацијата на Трамп моментално е насочено кон други меѓународни прашања, што дополнително ги комплицира дипломатските напори.