Нетанјаху бара Хезболах да се разоружа, Хезболах бара Израел да се повлече од земјата

Израелскиот премиер Бенјамин Нетанјаху ѝ нареди на војската да ја прошири безбедносната зона во јужен Либан, бидејќи борбите со милицијата Хезболах, поддржана од Иран, продолжуваат, соопшти неговата канцеларија доцна синоќа.

Израел, исто така, води преговори со Либан. Кабинетот за безбедност вчера разговараше за можно примирје, но го заврши состанокот без одлука.

Израелските и либанските претставници одржаа директни политички разговори во Вашингтон во вторникот за прв пат по децении.

- Advertisement -

Нетанјаху рече дека разговорите имаат за цел да обезбедат разоружување на Хезболах и да постигнат траен мир.

Осврнувајќи се на разговорите со Либан во вторникот, Нетанјаху рече дека Израел бара „разоружување на Хезболах и траен мир“, без да спомене евентуално прекин на огнот. Тој изјави дека израелските воени операции во јужен Либан се во тек и дека целта е градот Бинт Џбеил, кој го опиша како упориште на Хезболах.

Либанската влада, која не е страна во конфликтот меѓу Израел и Хезболах, бара прекин на огнот и повлекување на израелските трупи од јужен Либан.

Судирите меѓу израелските сили и Хезболах вчера продолжија. Нетанјаху рече дека безбедносната зона ќе се прошири и кон исток кон падините на планината Хермон за подобра поддршка на заедниците на друзите, кои се сметаат за сојузници со Израел. Планинскиот масив се протега по должината на сириско-либанската граница и достигнува до Голанската Висорамнина, анектирана од Израел.

Американскиот претседател Доналд Трамп соопшти дека разговорите меѓу Израел и Либан за прекин на огнот ќе се одржат денеска.

На социјалната мрежа Трут соушл тој најави дека разговорите ќе се одржат меѓу лидерите на двете земји.

„Се обидувам да добијам простор за дишење меѓу Израел и Либан. Помина долго време откако двајцата лидери разговараа, околу 34 години. Тоа ќе се случи денеска“, напиша Трамп.

Висок функционер на Хезболах изјави дека договор за прекин на огнот во Либан може да се постигне уште вечерва, изразувајќи претпазлив оптимизам по повеќе од еден месец борби.

– Настаните во последните неколку часа дадоа импулс во оваа насока – изјави функционерот за Ен-Би-Си њус, додавајќи дека разговорите за договорот се во тек и дека „напредокот е поврзан со израелската позиција“.

Израел се обидува да ја одвои војната против Хезболах од каков било мировен договор меѓу Иран и САД, но Техеран инсистира дека прекинот на огнот мора да ги опфати и борбите на неговата сојузничка група.

– Израел во моментов го разгледува прашањето и сè уште не презел никаква формална обврска. Исходот се очекува во наредните часови – додаде функционерот на Хезболах.

Тој појасни дека согласноста на Хезболах зависи од посветеноста на Израел на прекин на огнот.

– Доколку Израел е целосно посветен на целосно прекинување на непријателствата, тогаш Хезболах ќе го разгледа прашањето. Континуираното присуство на Израел во делови од Либан останува клучно спорно прашање – рече тој.

Претседателот на иранскиот парламент и еден од највлијателните луѓе во земјата, Мохамед Багер Галибаф, пак, издаде ново предупредување до САД, велејќи дека Вашингтон мора да се обврзе на прекин на огнот во Либан.

Зборувајќи за судирите во земјата, каде што Израел ги таргетира позициите на Хезболах, Галибаф рече дека САД треба да се повлечат во случај на какво било израелско кршење на прекинот на огнот или нова воена ескалација.

– Воспоставувањето и консолидацијата на сеопфатен прекин на огнот во Либан ќе биде резултат на непоколебливоста и борбата на почитуваниот Хезболах и неговиот херојство – изјави тој.

Тој додаде дека Техеран и неговите сојузници дејствуваат обединето.

–  Отпорот и Иран се еден ист ентитет, без разлика дали се во војна или во прекин на огнот – речеГалибаф.