Светска банка, ММФ и МАЕ предупредуваат на последиците од војната на Блискиот Исток

Лидерите на Меѓународниот монетарен фонд (ММФ), Групацијата на Светска банка (СБ) и Меѓународната агенција за енергија (МАЕ) предупредија дека војната на Блискиот Исток има силно и нееднакво влијание врз глобалната економија, особено погодувајќи ги земјите зависни од увоз на енергија.

Во заедничката изјава по состанокот во Вашингтон, трите институции истакнуваат дека шокот предизвикан од војната довел до зголемување на цените на нафтата, гасот и ѓубривата, што дополнително ги зголемува загриженостите за безбедноста на снабдувањето со храна и стабилноста на пазарот на трудот, особено во посиромашните земји.

Се оценува дека земјите увозници на енергија беа особено погодени, додека некои извозници на нафта и гас од Блискиот Исток претрпеа значителен пад на приходите од извоз поради нарушувања на пазарот.

- Advertisement -

„Ситуацијата останува многу неизвесна, а бродскиот сообраќај низ Ормускиот теснец сè уште не е нормализиран. Дури и откако ќе се обнови редовниот превоз низ теснецот, ќе биде потребно време глобалните залихи на клучни стоки да се вратат на нивоата од пред конфликтот – а цените на горивото и ѓубривата може да останат високи подолг временски период со оглед на штетата на инфраструктурата. Поради прекините во снабдувањето, недостигот на клучни инпути веројатно ќе има импликации врз енергетската, прехранбената и другите индустрии“, предупредуваат трите организации.

Во него се додава и дека војната, исто така, доведе до раселување на населението, губење на работни места и пад на туризмот, што дополнително го забавува економското закрепнување и го зголемува притисокот врз националните буџети, се наведува во соопштението.

Институциите на состанокот ги разменија најновите проценки пред објавувањето на извештајот на ММФ за светските економски перспективи и месечниот извештај на ИЕА за нафтата, кој ќе обезбеди подетален преглед на ефектите од конфликтот врз енергетските пазари и глобалниот раст.

Според веб-страницата на Фондот, посебно внимание се посветува на земјите најпогодени од кризата, со акцент на потребата од прилагодени економски политики и финансиска поддршка, каде што е потребно.

ММФ и Светската банка објавија дека, во соработка со партнерите, ќе продолжат да го следат развојот на ситуацијата и да ги координираат мерките за поддршка, со цел ублажување на последиците од кризата и создавање основа за стабилно и одржливо економско закрепнување.