Зеленски се пофали со иднината на бојното поле

За првпат од почетокот на војната во Украина, непријателска позиција била целосно заземена со копнени роботски системи и беспилотни летала – без учество на пешадија, соопшти претседателот Володимир Зеленски.

Во обраќање до работниците во одбранбено-индустрискиот комплекс, Зеленски нагласи дека операцијата била изведена исклучиво со беспилотни платформи.

– Иднината е тука, на бојното поле, а Украина ја создава. Ова се нашите копнени роботски системи – изјави Зеленски.

- Advertisement -

Тој додаде дека станува збор за историски момент во војната, бидејќи позицијата била освоена без директно учество на војници на терен.

– За прв пат во историјата на оваа војна, непријателска позиција беше заземена исклучиво од беспилотни платформи и беспилотни летала. Окупаторите се предадоа, а операцијата беше завршена без вклучување на пешадијата и без загуби од наша страна – рече Зеленски.

Според него, роботските системи одиграле клучна улога во најопасните зони на фронтот.

– Робот влезе во најопасните зони наместо војник. Со други зборови, илјадници животи се спасени – истакна украинскиот претседател.

Зеленски наведе дека системите како „Рател“, „Термит“, „Ардал“, „Ринкс“, „Змиј“, „Протектор“ и „Воља“ реализирале повеќе од 22.000 мисии во последните три месеци, што, како што рече, значи илјадници избегнати ризици за украинските војници.