Силна експлозија вчера попладне зафати стратешки мост кај Панамскиот Канал

Силна експлозија вчера попладне зафати стратешки мост кај Панамскиот Канал. Според локалните власти, неколку лица се повредени, а едно лице е исчезнато. Експлозијата се случи во складиште за гориво, а Мостот на Америка беше зафатен од пожар.

Шокантните снимки од безбедносните камери го забележаа моментот на експлозијата, додека пламените јазици го зафатија мостот во еден миг. На видеата се гледаат возила на мостот кои се  обидуваат да избегаат од пожарот.

- Advertisement -

Мостот на Америка е клучна сообраќајна артерија. Долг е 1.654 метри и го премостува влезот од Пацифичкиот канал во Панамскиот канал.

Според локалните медиуми, пожарникарите изјавиле дека биле известени за пожар на цистерна во складиште за гориво во 16:12 часот по локално време.

„По пристигнувањето, единиците потврдија дека 3 камиони и дополнителни резервоари се во пламен, па веднаш активиравме засилувања од неколку станици“, се вели во соопштението на противпожарната бригада Бомберос Панама.

Според спасувачите, две лица претрпеле изгореници од втор степен. Спасувачките екипи сè уште бараат едно лице кое би можело да биде заробено во урнатините или во складишните конструкции.

Властите на Панама привремено го затворија мостот.

„Специјализирани технички тимови ќе извршат детална проверка на конструкцијата, за да ја потврдат состојбата на мостот по изложеноста на екстремни температури“, соопшти локалното министерство за инфраструктура.

Мостот ќе остане затворен сè додека експертите не потврдат дека е целосно безбеден за возење и не обезбедат технички сертификати за интегритетот на конструкцијата.

Истрагата за причините за експлозијата е во тек. Нема информации дека се работи за саботажа. Најверојатно станува збор за технички дефект при полнење гориво или палење од искра, електрична инсталација или мотор, по што настанале секундарни експлозии од соседните цистерни.

Според официјалните лица во Панамскиот Канал, експлозијата немала никакво влијание врз работата на каналот и бродовите продолжиле нормално да транзитираат.