Последната недела од изборната кампања во Унгарија беше засенета од безбедносен инцидент поврзан со гасоводот што ја поврзува земјата со Србија

Последната недела од изборната кампања во Унгарија беше засенета од безбедносен инцидент поврзан со гасоводот што ја поврзува земјата со Србија. Претседателот Александар Вучиќ соопшти дека во близина на трасата е пронајдена поголема количина експлозив, што предизвика реакции во двете држави.

Независни унгарски новинари посочуваат дека веќе извесно време се дискутира за можноста надворешни фактори да се обидат да влијаат врз изборниот процес. Дел од медиумите во Унгарија наведуваат дека безбедносни експерти претходно предупредиле на потенцијална операција под лажно знаме насочена кон критична инфраструктура од унгарски интерес.

По објавата, премиерот Виктор Орбан свика итен состанок на Советот за одбрана, по што беше одлучено да се засили обезбедувањето на делот од гасоводот Турски тек што минува низ унгарска територија. Орбан изјави дека во инцидентот нема повредени и дека бил спречен можен акт на саботажа.

- Advertisement -

Во видео објавено на неговиот профил на Фејсбук, Орбан му се заблагодари на Вучиќ за, како што рече, брзиот одговор. Следниот ден, тој повторно се огласи со порака дека заминува кон унгарско-српската граница за да ја провери состојбата на терен.

– Велигденски понеделник, 6 часот наутро. Наместо да полеваме, одиме на унгарско-српската граница. Вчера се обидоа да го дигнат во воздух гасоводот од српска страна. Проверуваме дали сè е во ред од унгарска страна. Ќе известувам во живо за развојот на настаните – рече Орбан.

Во меѓувреме, опозицијата во Унгарија реагираше обвинувајќи дека станува збор за политички потег поврзан со изборната кампања, тврдејќи дека инцидентот се користи за мобилизација на гласачите.