НОВ ПОВИК ЗА КУПУВАЊЕ ИНВЕРТЕР КЛИМА УРЕДИ

Министерството за енергетика, рударство и минерални суровини објави јавен повик за ваучери за купување и вградување на инвертер клима уреди, наменет за заштита на ранливите потрошувачи на енергија за 2026 година.

Рокот за поднесување на барања изнесува 30 дена од денот на објавување на јавниот повик.

Како што е најавено, процесот на аплицирање ќе се одвива целосно електронски, преку веб-страницата на Министерството www.aplikanti.energy.gov.mk,  со што значително се поедноставува постапката за граѓаните.

- Advertisement -

-Наместо досегашното доставување документи во хартиена форма и чекање пред архиви, апликантите ќе можат да го завршат целиот процес онлајн – брзо, едноставно и без непотребни административни бариери. Ова претставува конкретен чекор кон дигитализација и модернизација на јавните услуги, со јасна цел – институциите да бидат поблиску до граѓаните и нивните реални потреби. Начинот на аплицирање ќе биде детално објаснет и јавно достапен, за да се обезбеди еднаков пристап за сите заинтересирани- велат од Министерството за енергетика.

Според објавата, ќе се доделуваат на ваучери за набавка и вградување на инвертер клима уреди со моќност од 3,5 kW и најмалку енергетска класа А+..

Право на учество имаат домаќинства во кои живеат лица корисници на надоместок заради попреченост, како и домаќинства со деца со попреченост кои користат посебен додаток до 26 години, при што се утврдени јасни доходни критериуми за 2025 година. При пресметката на вкупниот доход не се земаат предвид надоместоците за попреченост, со цел поддршката да стигне до оние на кои им е најпотребна.

Право на учество имаат:

1. Домаќинства со лица корисници на надоместок заради попреченост, чиј вкупен месечен нето доход во 2025 година не надминува:

• 30.000 денари за едночлено домаќинство
• 45.000 денари за домаќинство со два члена
• 63.000 денари за домаќинство со три члена
• 83.000 денари за домаќинство со четири и повеќе члена

2. Домаќинства со деца со попреченост (до 26 години), корисници на посебен додаток, со месечен доход во 2025 година до:

• 45.000 денари за домаќинство со два члена
• 63.000 денари за домаќинство со три члена
• 83.000 денари за домаќинство со четири и повеќе члена

Едно лице може да поднесе само едно барање по домаќинство, не се опфатени лица кои користат цивилна или воена инвалиднина, корисници на гарантирана минимална помош и додаток за енергенси

Изборот на корисници ќе се врши врз основа на уредни и комплетни апликации, сè до исцрпување на предвидените средства, а Министерството по службена должност ќе врши проверка на податоците преку надлежните институции. Листите на корисници и донесените решенија ќе бидат јавно објавени и доставени по електронски пат.