Енергетиката бележи рекорден пад од 17,2% на производството

За 4,2% е намалено индустриското производство во февруари годинава во споредба со истиот месец од минатата година, објави Државниот завод за статистика (ДЗС).

Пад на производството е забележан во трите главни сектори. Во секторот „рударство и вадење камен“ падот е од 9,6%, во секторот „преработувачка индустрија“ од 1,9, а во секторот „снабдување со електрична енергија, гас, пареа и климатизација“ од 17,2%.

Најголемо влијание врз падот на индустриското производство во преработувачката индустрија има намалувањето на производството во одделите – производство на машини и уреди, неспоменати на друго место со 13,5% и снабдување со електрична енергија, гас, пареа и климатизација со 17,2%  и  производство на облека со 5,4%.

- Advertisement -

Пада на производството има и во одделите – производство на тутунски производи; на текстил;  на основни фармацевтски производи и фармацевтски препарати; на производи од гума и производи од пластични маси; на метали; на фабрикувани метални производи, освен машини и опрема; на машини и уреди, неспоменати на друго место; и на мебел.

Според главните индустриски групи, производството во февруари 2026 година, во однос на февруари 2025 година, бележи опаѓање кај „енергија“ за 19%, „трајни производи за широка потрошувачка“ за 12% и „нетрајни производи за широка потрошувачка“ за 6,9%, додека пораст има кај „интермедијарни производи, освен енергија“ за 0,2 и „капитални производи“ за 2,1%.