Кир Стармер ги нарече заканите на Трамп „обичен шум“

Британскиот премиер Кир Стармер ги карактеризираше како „обичен шум“ изјавите на американскиот претседател Доналд Трамп дека размислува за повлекување на САД од НАТО, пренесува ДПА.

Трамп, кој исто така тврдеше дека Обединетото Кралство нема морнарица, ги нападна сојузниците дека не му се приклучиле во војната против Иран. Прашан од весникот „Телеграф“ дали ќе го преиспита членството во Алијансата, Трамп одговори: „О, да, би рекол дека тоа е веќе надвор од секакво преиспитување“. Тој додаде дека никогаш не бил импресиониран од НАТО, нарекувајќи го „тигар од хартија“, и додаде дека и рускиот претседател Владимир Путин го знае тоа.

Одговарајќи на овие коментари, Стармер денеска истакна дека НАТО е најефикасниот воен сојуз во историјата кој со децении ја одржува безбедноста и дека Британија останува целосно посветена на него.

- Advertisement -

– Без оглед на притисокот врз мене и другите, без оглед на ‘шумот’, јас ќе дејствувам во британскиот национален интерес во сите одлуки што ги носам. Затоа бев апсолутно јасен дека ова не е наша војна и нема да дозволиме да бидеме вовлечени во неа – изјави Стармер. Тој додаде дека Британија мора да има поблиски врски со Европа во сферата на одбраната и безбедноста, најавувајќи нов самит за оваа намена.

Во интервјуто, Трамп упати остри критики до сојузниците бидејќи одбиле да испратат воени бродови за повторно отворање на Ормуската Теснина, која Техеран ја држи под блокада со недели, предизвикувајќи скок на цените на енергенсите. Претседателот на САД изрази разочарување, нагласувајќи дека поддршката требало да биде автоматска, како што САД автоматски помогнале во случајот со Украина.

Трамп посебно ја прекори Велика Британија за неангажирањето во американско-израелската војна против Иран, сугерирајќи дека Кралската морнарица не е подготвена.

– Вие немате ни морнарица. Премногу сте стари и имавте носачи на авиони кои не работеа – рече Трамп. Тој исто така го критикуваше Стармер за неговата енергетска политика, тврдејќи дека премиерот е фокусиран на скапи ветерници кои ги покачуваат цените на струјата.