Почнува летното сметање на времето

Летното сметање на времето почнува ноќеска во 2 часот кога стрелките на часовникот ќе се поместат еден час напред и наместо 2 ќе биде 3 часот.

Тоа значи дека наредната ноќ ќе спиеме еден час помалку, но ќе имаме подолги денови и повеќе дневна светлина попладне.

Промената на времето кај нас, како и во повеќето европски земји, се случува двапати во годината – во последниот викенд во март почнува летното сметање, а во последниот викенд во октомври почнува зимското сметање на времето.

- Advertisement -

Годинава, летното сметање на времето ќе трае до 25 октомври во 3 часот по полноќ.

Одлуката за воведување на летното сметање на времето е во согласност со Законот за сметање на времето од 1996 година и е во согласност со европски директиви.

Освен кај нас, летното сметање на времето ќе го применат и поголем дел од европските земји, освен Русија, Турција, Белорусија и во Исланд.

Сезонското менување на времето се применува и во повеќето земји од Северна и од Централна Америка, како и во повеќе други држави во светот.

Европскиот парламент на 4 март 2019 година изгласа да биде укинато сезонското поместување на времето од 2021 година. Но, Советот на ЕУ сè уште нема донесено конечна одлука, па не е сосема сигурно кога ќе биде последното поместување на часовниците.

Времето не се менува во Јапонија, Кина, Јужна Кореја, ниту во земјите од африканскиот континент.