МАРТА КОС ЈА ОДБИ ИДЕЈАТА НА ВУЧИЌ И НА РАМА

Дали лидерите знаат колку треба да постигнат за да бидат дел од Шенген или заедничкиот пазар, вели еврокомесарката Марта Кос коментирајќи ја идејата на албанскиот премиер и на српскиот претседател.

Таа изјави дека влегувањето на една земја во Шенген или во заедничкиот пазар на Европската Унија бара реформи исто толку тешки како и оние за полноправно членство во Унијата.

Во авторски текст за германскиот „ФАЗ“, Рама и Вучиќ претходно се пожалија на бавното темпо на интеграцијата, посочувајќи на внатрешни реформи, геополитички тензии и институционални ограничувања. Тие предложија нивните земји да бидат дел од единствениот пазар и Шенген зоната без да добијат политичко право и право на вето како полноправни членки.

- Advertisement -

Кос го отфрли овој предлог. Говорејќи на самитот „Конкурентна Европа“ на „Политико“, таа исто така оцени и дека аспирациите на Украина за членство во ЕУ до 2027 година се „невозможни“, додека Исланд би можел да биде „посебен случај“ и побрзо да напредува доколку повторно ги отвори преговорите.

Еврокомесарката истакна дека Унијата треба да ги промени правилата за проширување и ги повика земјите членки да ги презентираат своите планови, откако беа отфрлени предлозите на Комисијата за обликување на процесот.

Таа потсети дека биле разгледувани три опции, задржување на статус кво, промена на системот за да се избегне стагнација на кандидатите и таканаречено „обратно проширување“.

– Од првата размена на мислења со членовите, јасно е дека третата опција не е правилна… тоа би била револуција – изјави Кос, додавајќи дека ниту статус кво не е прифатлива опција.

Како најверојатна, таа ја посочи втората опција, постепена интеграција со цел забрзување на процесот, но без заобиколување на потребните реформи.