ПОЧИНА СЛИКАРОТ ИЛИЈА ПЕНУШЛИСКИ

Сликарот Илија Пенушлиски, кој остави извонреден белег во македонската уметност, почина на 79 години.

Веста ја соопшти неговиот син Илија Митрев Пенушлиски во објава на социјалните мрежи.

„Татко ми почина вчера. Живееше без преправање, без оклоп, непропустлив за бучавата на времето. Живееше со длабок хуманизам, незаситна љубопитност, желба за живот и непоколеблива луцидност и присутност. Немаше никаква приврзаност кон нештата – само кон идеите, креацијата и луѓето. Беше исклучителен уметник, познат на многумина, но рамнодушен кон тоа да биде познат. Неговите идоли беа уметници, каубои, пијаници и Хозе Мухика“, објави Митрев Пенушлиски.

- Advertisement -

Илија е син на Кирил Пенушлиски, истакнат македонски фолклорист роден во Солун, а беше сопруг на Илинка Митрева, поранешната министерка за надворешни работи и пратеничка од редовите на СДСМ, која почина во јули 2022 година.

Илија Пенушлиски е роден во Скопје во 1947 година. Дипломирал на Академијата за ликовни уметности во Белград во 1971 година. Во 1972/73 бил на постдипломски студии на институтот „Прат“ во Њујорк. Тој оствари бројни самостојни изложби во Македонија и во странство. Неговата последна изложба, изложба „Градот“, за која за првпат во својата плодна и светска кариера работеше со дигитална графика, се одржа во 2018 година во скопската галерија „Акантус“.

Неговите дела често беа инспирирани од градската динамика, архитектурата и современиот начин на живот, при што користеше богата колористика и експресивен пристап.