Иранската опозиција во егзил најави дека е подготвена да формира привремена влада доколку дојде до пад на власта во Техеран

Топ Вести - Слушај сега

Иранската опозиција во егзил најави дека е подготвена да формира привремена влада доколку дојде до пад на власта во Техеран.

- Advertisement -

Национален совет за отпор на Иран соопшти дека има план за транзициска власт која би организирала избори во рок од шест месеци по евентуалното соборување на сегашното раководство во земјата.

Планот се темели на политичка програма од десет точки предложена од лидерската фигура на организацијата, Марјам Раџави. Со него, како што наведуваат од НЦРИ, треба да се овозможи мирен пренос на власта и воспоставување демократски институции.

Организацијата ја отфрла идејата за политичка транзиција под водство на Реза Пахлави, син на последниот ирански шах, кој живее во егзил во Соединетите Американски Држави.

Националниот совет за отпор на Иран е формиран во 1981 година од страна на движењето Народни муџахедини на Иран, кое има за цел промена на политичкиот систем во Иран.

Сепак, организацијата со години предизвикува контроверзии. Дел од опозициските групи во и надвор од Иран ја отфрлаат, а нејзините активности се забранети во земјата.

МЕК во минатото водеше вооружени активности против иранската власт од територијата на Ирак и во одредени периоди беше ставена на листите на терористички организации во Европа и САД. Критичарите тврдат дека нејзината внатрешна структура е недемократска.

Од НЦРИ тврдат дека располагаат со мрежа на поддржувачи, разузнавачки капацитети и „ослободителни сили“ кои можат да дејствуваат и во силно обезбедени делови од Иран.