МИГРАНТИ ЗА ПАРИ: Стружанка инкасирала над 8 МИЛИОНИ ЕВРА продавајќи работни визи за Македонија ,а сите заминувале за Шпанија

Топ Вести - Слушај сега

Додека ВМРО-ДПМНЕ и СДСМ се обвинуваат меѓусебно, редакцијата Охридскај открива конкретен механизам: жена од Струга наплаќала 7.000 евра по работник од Непал, ги вработувала во хотели, а Македонија служела само како времен транзит кон Западна Европа.

- Advertisement -

Редакција Охридскај  |  9 март 2025  |  Истражувачка мрежа

Политичка бука, суштинска тишина

Месеци наназад, темата ‘мигранти за пари’ е во центарот на политичкиот судир помеѓу ВМРО-ДПМНЕ и СДСМ. СДСМ обвинува. ВМРО-ДПМНЕ демантира и контраобвинува. Јавноста слуша обвинувања без конкретни имиња, бројки или докази.

Редакцијата Охридскај одлучи да пробие низ политичката магла и да побара конкретни одговори: кој заработува, колку и со чија поддршка.

7.000 евра по глава — бизнис модел на една стружанка

Според сознанијата до кои дојде нашата редакција, клучна фигура во овој систем е жена од Струга која работи како менаџер и посредник за работници од Непал кои пристигнуваат во Македонија.

Системот е едноставен, но профитабилен: дотичната ги вработува работниците во хотели и други објекти, им ги средува работните визи низ официјалниот административен пат — а за возврат наплаќа 7.000 евра по работник. Парите се платени пред поаѓање или по пристигнување, зависно од договорот.

Целта на работниците никогаш не е Македонија — таа служи само како транзитна територија. Штом ќе ја добијат македонската работна виза, работниците веднаш заминуваат за Шпанија, каде вработувањето и животниот стандард се поповолни.

  КЛУЧНА БРОЈКА: Според проценките на редакцијата Охридскај, оваа жена досега инкасирала над 8.000.000 евра преку овој систем — секако, со амин на власта.

Кинеска и индиска компанија: уште две нишки

Случајот не запира кај непалските работници. Редакцијата Охридскај дознава дека кинеската компанија Синохидро донела над 500 работници од Бангладеш во Македонија. Индиската компанија Сахара Груп пак — преку различни договорни аранжмани — довела над 200 работници од Бангладеш, кои потоа биле изнајмувани на македонски фирми — дневно, неделно или месечно, по потреба.

И тука моделот е познат: формално вработување во Македонија, фактичка транзиција кон Западна Европа, конкретно — Шпанија. ‘Кидавела’ штом ќе ги средат документите, велат наши извори.

Прашањата кои чекаат одговор

Остануваат клучни прашања на кои државата — и двете политички опции — не дале одговор:

— Кои институции го одобрувале издавањето на работни визи во овој контекст?

— Кој имал корист, покрај директните посредници?

— Колку работни дозволи биле издадени во последните три години за работници кои ‘исчезнале’ по добивањето виза?

— Дали постои поврзаност со регистрирани фирми блиски до власта?

Редакцијата Охридскај продолжува со истрагата. Дополнителни информации и докази ги собираме и ги очекуваме во наредниот период. Сите засегнати страни имаат право на одговор .