Хрватската влада ги ограничи цените на горивата поради ситуацијата на Блискиот Исток и војната во Иран, која влијае и на пазарот на нафтени деривати

Топ Вести - Слушај сега

Хрватската влада ги ограничи цените на горивата поради ситуацијата на Блискиот Исток и војната во Иран, која влијае и на пазарот на нафтени деривати, објавија хрватските медиуми.

- Advertisement -

Според медиумите, направени се измени на две уредби – за утврдување на највисоките малопродажни цени на нафтените деривати и за износот на акцизата за енергетските производи и електричната енергија.

Новите цени на горивата ќе се применуваат од утре  и ќе важат две недели..

Дизелот без адитиви ќе чини 1,55 евра, синиот дизел ќе чини 0,89 евра, еуросуперот 1,50 евра, а  автомобилскиот гас ќе чини 1,70 евра. Цената на гасот во боца се зголемува за 2 цента и ќе чини 2,40 евра.

Хрватскиот премиер Андреј Пленковиќ пред вонредната седница на владата изјави дека ќе се утврдат цените на нафтата на двонеделно ниво, а ќе се утврди и висината на премијата и процентот на намалување на  акцизите за дизел горивото.

– Моменталната цена на дизелот без адитиви е 1,48 евра за литар. Доколку Владата не реагираше, цената утре во Хрватска ќе беше 1,72 евра за литар. Го ограничуваме растот на 7 центи, на 1,55 евра. Еуросупер чини 1,46 евра за литар. Без наша интервенција, ќе чинеше 1,55 евра, а вака утре ќе чини 1,50 евра. Синиот дизел моментално чини 0,80 евра за литар. Доколку немаше мерки, цената ќе беше 1,06, а со владините мерки е 0,89 евра. Кога станува збор за течен нафтен гас во резервоари, таа е 1,67 евра, ќе се искачи на 1,87, а со мерките ќе биде 1,70. Што се однесува до боци, ќе има зголемување од само 2 цента на 2,40 евра – изјави Пченковиќ.

Тој рече дека владата имала две цели при ограничувањето на цените на горивата – безбедноста на снабдувањето со енергија и попристапни цени за граѓаните и економијата.

Повод за вонредната седница на хрватската влада, како што е објавено бил високиот раст на цената на нафтата и неизвесноста предизвикана од конфликтот на Блискиот Исток.

Цените на нафтата скокнаа за повеќе од 25% рано утрово на највисоко ниво од јули 2022 година, бидејќи ескалацијата на кризата на Блискиот Исток го блокираше извозот на нафта преку Ормутскиот теснец, предизвикувајќи намалување на производството во областа.

На американскиот пазар, цената на барел нафта беше 116,15 долари околу 3:30 часот наутро, околу 28 проценти повисока отколку во петокот навечер. Цената на нафтата на лондонскиот пазар скокна, од друга страна, за 25,5 %, на 116,35 долари.

Остриот скок на цените на нафтата следеше по нападот на САД и Израел врз Иран пред една недела, што доведе до ескалација на кризата на Блискиот Исток. Затоа нафтата не може да се извезува преку Ормутскиот теснец, низ кој секојдневно минуваат околу 20 милиони барели или околу 20 проценти од глобалната потрошувачка на нафта.