Шест дена од почетокот на војната, сè повеќе лидери на земји од ЕУ се јавуваат со ветувања за одбранбена помош за Кипар и сојузниците во Заливот

Топ Вести - Слушај сега

Шест дена од почетокот на војната, сè повеќе лидери на земји од ЕУ се јавуваат со ветувања за одбранбена помош за Кипар и сојузниците во Заливот.

- Advertisement -

Грција, Велика Британија и Франција пред два дена соопштија дека испраќаат бродови и противвоздушна одбрана на Кипар, откако беа истрелани дронови кон базата на РАФ (Кралските воздухопловни сили) во Акротири на островот. Сега ним им се придружија Италија и Шпанија, а Холандија исто така размислува за помош.

Како што пренесе Би-Би-Си, иако прилично бавно, почна да се појавува обединет фронт меѓу клучните НАТО сојузници во Европа. Првично постоеше неподготвеност за вклучување кај Италија, а особено кај Шпанија, која одби да им дозволи на САД да ги користат заедничките воздухопловни бази во Морон и Рота за напади врз Иран.

Шпанскиот министер за одбрана изјави дека фрегатата Cristóbal Colón им се придружува на сојузниците за да ја покаже „посветеноста на одбраната на Европската Унија и нејзината источна граница“.

Франција штотуку се согласи да им дозволи на американските воени авиони „привремено“ да ги користат нејзините бази, бидејќи тие обезбедуваат „заштита за нашите партнери во Заливот“.

Осудувајќи ја „непромислената“ одлука на Иран да ги бомбардира своите соседи, италијанската премиерка Џорџа Мелони изјави дека доколку американските авиони сакаат да ги користат базите во Италија за бомбардерски мисии, тоа ќе мора да биде одобрено и од владата и од парламентот.

Судејќи според денешното соопштение од Франција, Италија и Грција, европските сојузници исто така сакаат да ја осигураат безбедноста на превозот во Црвеното Море, исто колку што сакаат да покажат солидарност во Источниот Медитеран, пишува Би-Би-Си.

Британскиот медиум претходно јави дека неколку европски земји испраќаат поморски средства за да го заштитат Кипар, земја-членка на ЕУ, откако британска воена на островот беше погодена од дрон.

Италијанскиот министер за одбрана, Гвидо Кросето, изјави дека Италија ќе испрати „поморски средства“ за да го заштити Кипар – заедно со Шпанија, Франција и Холандија. Кросето изјави дека распоредувањето ќе се случи во наредните денови.

Кабинетот на францускиот претседател Емануел Макрон соопшти дека тој ги повикал италијанските и грчките лидери и дека тие се согласиле да испратат воени средства на Кипар.