Мерка притвор му е одредена на сопственикот на фабриката за бисквити „Виоланда“ во грчкиот град Трикала за експлозијата на крајот на јануари, во која загинаа пет работнички

Топ Вести - Слушај сега

Мерка притвор му е одредена на сопственикот на фабриката за бисквити „Виоланда“ во грчкиот град Трикала за експлозијата на крајот на јануари, во која загинаа пет работнички, јави дописничката на МИА од Атина.

- Advertisement -

По вчерашниот маратонски исказ пред истражен судија и обвинител во Трикала, сопственикот Константинос Ѕиорѕиотис е пренесен во затвор, а според грчките медиуми, во одбраната се обидел да објасни дека како човек што управува и раководи со компанија со многу голем профит не можел да има познавања за техничките прашања за кои имал соработници – машински, градежни и електроинженери и имал доверба во нив.

Како што објави државната телевизија ЕРТ, тој изјавил дека е потресен од експлозијата и од загубата на петте негови работнички, рекол дека не знаел дека постои таква опасност, а одговорноста ја префрлил на оние што ги потпишале студиите и елаборатите на компанијата и се оградил од одговорноста за она што се случувало во фабриката.

Според сведоштвата на вработените, мирисот на пропан бил присутен извесен период пред експлозијата за што информирале и сигнализирале до надлежните, а сопственикот во исказот рекол дека за тоа дознал доцна.

ЕРТ објави дека и безбедносните мерки во објектот што беше срамнет со земја од експлозијата биле, како што произлегува и од студијата за противпожарна заштита, недоволни, односно не постоел автоматски систем за детекција на пожар, ниту автоматски систем за откривање експлозивни материјали, а наместо автоматско ладење, функционирал само едноставен детектор и рачен систем за пријавување пожар.

Обвинението за сопственикот на „Виоланда“ опфаќа предизвикување експлозија со евентуална умисла и повеќекратно убиство од небрежност.

Вчера, додека Ѕиорѕиотис даваше исказ, пред Основниот суд во Трикала се собраа вработени во индустријата изразувајќи му поддршка, а во вторникот 256 вработени потпишаа текст, исто така со поддршка за сопственикот.

По експлозијата, беа спроведени проверки и на другите две фабрики на „Виоланда“, едната е затворена, а третата продолжува со работа.

Експлозијата во фабриката за бисквити се случи на 26 јануари за време на ноќната смена со 12 вработени, при што животот го загубија пет работнички, а другите беа полесно повредени.

Според истрагата на Дирекцијата за истрага на кривични дела поврзани со подметнување пожари (ДАЕЕ) на противпожарната служба на Грција, причината за експлозијата е подземното повеќемесечно истекување пропан, кој дошол во контакт со искра предизвикана од електромеханичка опрема во фабриката.