ПРЕМИЕРОТ НА САРАЕВСКИОТ КАНТОН ПОДНЕСЕ ОСТАВКА

Топ Вести - Слушај сега

Премиерот на Сараевскиот кантон, Нихад Ук, поднесе оставка додека во Сараево трет ден по ред се одржуваат протести по трагичната трамвајска несреќа во која загина 23-годишно момче, а четири лица беа повредени.

- Advertisement -

Тој рече дека не бега од одговорноста и дека со овој чин сака да ја врати вербата во системот кој, како што рече, може и мора да биде транспарентен, фер и безбеден.

Во меѓувреме, возачот на трамвајот Аднан Касаповиќ е ослободен откако Кантонскиот суд во Сараево го отфрли барањето на Обвинителството на Сараевскиот кантон за определување притвор. Ден претходно, Обвинителството побара 30-дневен притвор, тврдејќи дека причина за несреќата е човечки фактор. Возачот се изјасни за невин и изјави дека несреќата е предизвикана од техничка неисправност на трамвајот.

На 12 февруари во близина на Националниот музеј на Босна и Херцеговина, трамвај излета од шините и ја урна трамвајската постојка, при што загина едно лице, а неколкумина беа повредени.

Дента по несреќата, стотици граѓани, вклучително голем број ученици и студенти, се собраа на местото на настанот и накратко го блокираа сообраќајот, оддавајќи ѝ почит на жртвата и барајќи итни мерки од властите.