Трамп со остра порака до Техеран

Топ Вести - Слушај сега

Американскиот претседател Доналд Трамп испрати остра порака до Техеран, предупредувајќи дека непостигнувањето договор со САД ќе има сериозни последици за Иран.

- Advertisement -

– Ќе биде многу трауматично за Иран ако не постигнат договор – изјави Трамп од Белата куќа, алудирајќи на застојот во преговорите околу иранската нуклеарна програма.

Тој посочи дека договор можел да биде постигнат уште минатата година, кога Вашингтон и Техеран водеа интензивни разговори за спорното нуклеарно прашање.

Изјавата доаѓа по средбата со израелскиот премиер Бенјамин Нетанјаху, по која Трамп нагласи дека повеќе би сакал дипломатско решение отколку воена интервенција. Разговорите со Нетанјаху ги оцени како „многу добри“, но додаде дека конечната одлука за следните чекори ќе ја донесе лично тој.

Израел со години предупредува дека договор кој би бил ограничен само на нуклеарната програма не е доволен. Тел Авив бара ограничување и на иранската програма за балистички ракети, како и прекин на поддршката за сојузничките групи во регионот.

Дел од функционерите во американската администрација, исто така, се залагаат за пошироки услови во евентуалниот договор. Сепак, Трамп досега не ги прецизирал јавно целите на САД во обновените разговори. Од друга страна, Иран останува на ставот дека е подготвен да преговара исклучиво за нуклеарното прашање.

Тензиите дополнително се зголемија откако иранските власти насилно ги задушија масовните протести во земјата. Во меѓувреме, Вашингтон го засили военото присуство во регионот, вклучително и со распоредување на носачот на авиони „USS Abraham Lincoln“.