Руските удари го преполовија нуклеарното производство на струја

Топ Вести - Слушај сега

Ескалацијата што ја погоди електричната мрежа ја турна Украина во најдлабока енергетска криза од почетокот на војната. Ударите врз високонапонските трафостаници ја пресекоа врската меѓу нуклеарните централи и мрежата и го преполовија производството на струја. Последиците се чувствуваат во секој дом и во секоја фабрика.

- Advertisement -

Русија извршила најжесток напад досега врз трафостаниците поврзани со нуклеарните централи на Украина. Производството на електрична енергија паднало за околу 50 проценти. Ова го соопштил Виталиј Зајченко, извршен директор на државниот оператор Укренерго, во разговор за „Киев Индепендент“.

Украинските екипи успеале да поправат една трафостаница што ги опслужува нуклеарните централи. Состојбата останува критична. Ударите ги погодија високонапонските јазли што ги поврзуваат трите оперативни нуклеарни централи со мрежата. Една реакторска единица била целосно исклучена.

– Русите беа многу успешни. Сите наши нуклеарни централи беа принудени да го намалат производството, а веднаш по нападот изгубивме половина од капацитетот – рече Зајченко

Кратко по ударите, низ целата земја беа воведени дополнителни прекини на струјата. Сето тоа се случува во средината на најстудената зима од почетокот на целосната инвазија. Погодени беа и термоцентрали и други енергетски објекти.

Претседателот Володимир Зеленски ги осуди нападите што се случија во време на мировни разговори меѓу Киев, Вашингтон и Москва. Неколку дена претходно, американскиот претседател Доналд Трамп изјави дека лично побарал од рускиот лидер Владимир Путин да се воздржи од удари врз Киев и другите градови. На 3 февруари следеа нови напади врз енергетски објекти.

На состанок на кабинетот, Зеленски побара засилена заштита за инфраструктурата поврзана со нуклеарните централи. Тој нагласи потреба од повеќе ракети за воздушна одбрана и побрза испорака.

„Нашите нуклеарни централи остануваат практично постојани цели. Ова бара поинакво ниво на одговор од сегашното. Ни треба поголема заштита и поголема комуникација со партнерите за светот да не молчи“, напиша Зеленски на Телеграм.