СУСПЕНДИРАНИ АГЕНТИТЕ КОИ ГО УБИЈА АЛЕКС ПРЕТИ ВО МИНЕАПОЛИС

Топ Вести - Слушај сега

Службениците на Царинската и граничната заштита на САД вклучени во фаталното пукање врз Алекс Прети во Минесота во саботата се привремено отстранети од должност, потврди за Си-Ен-Ен висок функционер на Министерството за внатрешна безбедност. Овој потег беше очекуван, изјави функционер на Граничната патрола Грегори Бовино претходно оваа недела.

- Advertisement -

Привременото отстранување од должност е стандардна процедура за службениците вклучени во пукања додека се во тек истрагите.

Двајца агенти на Царинската и граничната заштита на САД пукаа од своето службено оружје во инцидентот за време на викендот во Минеаполис, во кој беше убиен 37-годишниот Алекс Џефри Прети, болничар на одделот за интензивна нега. Во владиниот извештај испратен до Конгресот врз основа на прелиминарна истрага не се вели дека Прети посегнал по своето огнено оружје.

Според реконструкцијата на инцидентот, имиграциските агенти вршеле рација кога еден агент им се приближил на две жени кои свиркале и им наредил да се тргнат од патот. Кога не го сториле тоа, агентот физички ги турнал, а една од жените се стрчала кон Прети. Потоа агентот се обидел да ги тргне и жената и Прети од патот, а кога тие се спротивставиле, тој употребил солзавец. Потоа агентите се обиделе да го приведат Прети, кој се спротивставил, што резултирало со тепачка.

За време на тепачката, еден агент постојано извикувал дека Прети има пиштол. Околу 5 секунди подоцна, едниот агент пукал од својот службен пиштол „глок 19“, а другиот пукал од својот „глок 47“. По пукањето, агентот пријавил дека го зел огненото оружје на Прети, кое подоцна го истоварил и го ставил во своето возило. Извештајот не укажува дека Прети се обидел да го извади или употреби пиштолот.

Овој официјален извештај се разликува од претходните изјави на Министерството за внатрешна безбедност, кое во текот на викендот изјави дека само еден агент пукал во самоодбрана и дека Прети им се приближил на агентите со пиштол. Во часовите по инцидентот, високи функционери тврдеа дека Прети се обидел да ги нападне или убие агентите, но овие тврдења не се појавуваат во извештајот на Канцеларијата за професионална одговорност. Шефот на полицијата во Минеаполис потврди дека Прети имал дозвола за поседување и носење оружје.

Дополнително, прашања за интегритетот на истрагата покренува фактот дека агентите го отстраниле пиштолот на Прети од местото на настанот и го складирале во возило, без јасно да наведат дека е документиран или правилно евидентиран како доказ.