Медведев: Нападот врз резиденцијата на Путин можеше да доведе до употреба на специјално оружје

Украинскиот напад со беспилотни летала врз резиденцијата на рускиот претседател Владимир Путин во Новгородската област минатиот декември можеше да доведе до руски контранапад со употреба на специјално оружје, изјави денес заменик-претседателот на Советот за безбедност на Руската Федерација, Дмитриј Медведев.

– На крајот на краиштата, Европејците, а под администрацијата на Бајден, Американците, постојано нè провоцираа да донесуваме тешки одлуки, а овие провокации продолжуваат. Ваквите игри се исклучително опасни, рече Медведев во интервју за „Комерсант“.

Рускиот министер за надворешни работи, Сергеј Лавров, изјави дека режимот во Киев започнал напад врз руската претседателска резиденција во Новгородската област во ноќта на 29 декември користејќи 91 беспилотно летало. Тој рече дека сите беспилотни летала биле уништени од силите за воздушна одбрана и дека според официјалните извештаи немало жртви во нападот.