МАКЕДОНСКИТЕ РАКОМЕТАРИ ГО ЗАВРШИЈА ЕВРОПСКОТО ПРВЕНСТВО НА 14. МЕСТО
Топ Вести - Слушај сега
0:00
0:00
Македонската ракометна репрезентација го заврши настапот на Европското првенство на 14. место, во конкуренција на вкупно 24 репрезентации, откако не успеа да избори пласман во главната рунда, и покрај победата во последното коло од групната фаза.
Охрабрувачки звучи фактот што овој пласман е малку подобар од тој на претходното европско ракометно првенство, но депримира сознанието дека на ова првенство ќе бидеме веднаш зад Фарските Острови, кои најверојатно, поради подобрата гол-разлика, ќе бидат на 13. место. Претходното Европско првенство во ракомет за мажи се одржа во 2024 година, во Германија, Шведска и Норвешка, а Македонија го освои 17. место.
Во решавачките натпревари од групата, Македонија ја совлада Романија со 24:23, во драматичен меч решен во самиот финиш, со што ја задржа надежта за пласман понатаму. Сепак, паралелниот дуел целосно ја урна таа можност – Португалија ја победи Данска, резултат кој значеше дека македонската селекција, и покрај освоените три бода, останува на третото место во групата и го завршува шампионатот.
Епилогот од групата беше јасен: Португалија и Данска продолжија во главната рунда, а Македонија и Романија го завршија учеството. Така, македонските ракометари не успеаја да направат чекор повеќе, иако во последното коло ја покажаа својата борбеност и карактер.
Шампионатот за Македонија почна со тежок пораз од Данска, натпревар на кој фаворитот ја оправда улогата. Во второто коло следуваше значајно подобрување во играта и реми со Португалија (29:29), резултат што ја остави репрезентацијата во игра за пласман понатаму. Победата над Романија во третото коло ја заокружи групната фаза со една победа, едно реми и еден пораз, но тоа на крајот се покажа како недоволно.
Со ваков расплет, Македонија го затвори Европското првенство со солиден, но недовршен впечаток – покажан потенцијал и борбеност, но и уште една потврда дека за исчекор повеќе на големите натпреварувања потребни се континуитет и подобра реализација во клучните моменти.
ЗА НАС
ОhridSky е ваш доверлив извор за сеопфатно и избалансирано покривање на вестите. Со посветеност на интегритет и точност, обезбедуваме длабинско известување кое ги открива приказните што се најважни.
Links
© 2025 OhridSky. Сите права задржани.
