Оскаровката ги избегнала сексуалните предатори во Холивуд благодарение на моќта што ја стекнала на млада возраст

Топ Вести - Слушај сега

Напасниците користат сè што можат за да манипулираат и да ги натераат другите луѓе да го прават она што првиве сакаат тие да го прават, смета Џоди Фостер, позната актерка и режисерка, која во неодамнешното интервју за NPR откри дека таа веројатно успеала да избегне ситуации на сексуално вознемирување во Холивуд благодарение на моќта што ја стекнала на млада возраст.

- Advertisement -

Нејзината номинација за Оскар кога имала само 12 години, во 1977 година за улогата во „Таксист“ на Мартин Скорсезе, била клучна пресвртница што смета дека ја заштитила од предаторите во филмската индустрија.

– Навистина морав да го испитам тоа – како се спасив? Секако, имаше микроагресии, се присети подоцнежната двократна добитничка на „Оскар“.

– Секој кој бил на некакво работно место, имал искуство со мизогинистички микроагресии. Тоа е само дел од тоа да се биде жена, нели? Но, што ги спречи оние полоши, ужасни искуства? Она во што почнав да верувам е дека имав одредена моќ додека имав, да речеме – 12 години. Значи, кога веќе ја имав мојата прва номинација за „Оскар“, бев дел од таа различна категорија луѓе кои имаа моќ и бев „премногу опасна“ за да ме допрат – појасни Фостер.

Таа вели дека, сепак, сето тоа можеби се должи и на нејзината личност.

– Тоа што сум човек кој пристапува кон светот размислувајќи со своја глава. Многу е тешко емоционално да ме манипулирате, бидејќи не функционирам со емоциите на површина. Напасниците користат сè што можат за да манипулираат со другите луѓе, а тоа е многу полесно кога лицето е помладо, послабо, кога нема моќ. Токму тоа е однесувањето на напасникот – користење на моќта за да се понижат луѓето, за да се доминира врз нив – изјави „оскаровката“.

Фостер подоцна ќе стане пример за другите колешки и колеги кои се бореле со сексуализацијата и вознемирување во индустријата. Натали Портман во друга прилика откри дека повозрасната колешка ѝ се јавила откако ја слушнала како зборува за проблемите со сексуализацијата.

– Одржав говор на Женскиот марш за тоа како бев сексуализирана како млада актерка, и таа ме контактираше после тоа. И разговаравме, и беше неверојатно. Таа е сè уште пример за сите – нагласи Портман.

Слично како Фостер, и Портман имала 11 години кога ја добила улогата со која се прослави во „Леон: Професионалецот“, по што опасностите од сексуални напасници биле на секој чекор.

Портман вели дека како дете-актер постојано била следена од нејзината мајка која се грижела никој да не ѝ се приближи и додаде дека со таквите појави нема шега – секоја закана од сексуално вознемирување ја сфаќала сериозно.