Невремето предизвика штети во неколку градови

Топ Вести - Слушај сега

Обилните врнежи што ја зафатија Македонија предизвикаа излевања на реки, поплавени земјоделски површини, оштетена инфраструктура и прекини во сообраќајот на повеќе локации низ државата, информира Центарот за управување со кризи (ЦУК) во вонредната информација за состојбата до 9 часот утринава.

Источна Македонија: излевање кај Кочани и одрони на патиштата

- Advertisement -

Кај Оризарска река во селото Грдовци, на подрачјето меѓу Кочани и Штип, регистрирано е излевање на водата, при што ЈП „Водостопанство Брегалница“ интервенира со багер гасеничар. Механизацијата сè уште е на терен, а од понеделник е најавено чистење на речното корито од Грдовци кон Оризари, со цел да се спречат идни поплави.

Сообраќајот на патниот правец Кочани–Грдовци е нормализиран, додека на повеќе патишта во источниот регион се појавиле одрони, за чие расчистување интервенира „Македонијапат“.

Битолско: поплавени ниви, но без опасност за објектите

Во битолската населба Стрчин, КЈП „Нискоградба“ интервенира со механизација за расчистување на нанос од чакал и земја. Во селото Кравари има заезерени земјоделски површини, но без закана по објектите.

Поплавени земјоделски површини се регистрирани и во селата Жабени и Породин, каде што ЈП „Водостопанство“ интервенира на Жабјанска река. Излеана е и Елешка река, но, според ЦУК, нивото на водата во реките е во опаѓање.

Ресен: поплавени дворови и магацини за јаболка

Во Ресенско се пријавени поплавени земјоделски површини, дворови, куќи, помошни објекти и магацини за складирање на јаболка. Нивото на Голема река е намалено од 2,20 на 1,40 метри.

На терен се ангажирани екипи од Општина Ресен, „Македонијапат“ и ЈКП „Пролетер“, кои вршат обиколка и проценка на состојбата. Од ЦУК информираат дека состојбата е нормализирана.

Крушево: заматена вода за пиење

Поради поројните врнежи, водата за пиење во Крушево е заматена, поради што надлежните служби препорачуваат таа да се преврива најмалку 10 минути пред употреба.

Нивото на Црна река кај селото Бучин е покачено, но водата на местата каде што претходно била излеана веќе е повлечена. Екипи од ЈП „Комуна“, ТППЕ Крушево, ЕЛС Крушево и други надлежни служби интервенираат на зајакнување на насипите кај критичните точки.

Демир Хисар и Прилеп: затворен пат и штети кај жители

Во Демир Хисар, локалниот пат кон селото Мренога е затворен за сообраќај поради оштетување на мост на Боишка река. Локацијата е обезбедена од надлежните служби.

Во прилепското село Лажани пријавена е штета кај еден жител, со поплавен двор, приземни простории и оштетен тутун. Поплавувања имало и во селото Пешталево, поради неисчистени канали, каде што интервенирала градежна механизација за нивно расчистување.

Тетовско: забранет сообраќај кон Бање

Патот кон Бање Тетово е исчистен, но сообраќајот е забранет по одлука на СВР Тетово, од безбедносни причини. Патиштата кон селата Жерма и Бродец се проодни, додека состојбата во селото Стримница, Општина Желино, континуирано се следи од надлежните служби.