Грчките земјоделци утре ќе ги паузираат протестите и ќе празнуваат

Топ Вести - Слушај сега

Од 18 до 22 часот по македонско, односно од 19 до 23 часот по грчко време, според информациите на дописничката на МИА од Атина, повторно ќе биде затворен граничниот премин Евзони – Богородица за влез и излез од Грција за сите возила, додека пак во следните два дена не се планирани блокади поради утрешниот празник Водици во Грција.

- Advertisement -

Земјоделците од северниот дел на земјата кои од 1 декември нивните трактори ги паркираа на граничниот премин Евзони – Богородица исто како и вчера, така и денеска на четири часа ќе го блокираат сообраќајот за сите видови возила.

Во однос на следните денови, со оглед на тоа што утре во Грција се празнува Богојавление, земјоделците од целата земја, исто како и за Божиќ и Нова година, планираат да ги отворат сите автопатишта за непречено патување на граѓаните.

Според информациите на МИА, ова ќе важи и за Евзони и во вторник и среда не се планирани блокади.

На вчерашниот состанок на земјоделците од цела Грција, беше одлучена 48-часовна блокада, односно в четврток и петок да се блокира целата национална патна мрежа, споредните патишта и клучните патни правци во Грција, како и граничните премини.

Земјоделците од Евзони ќе учествуваат во конкретните 48-часовни активности, но планираат в среда да одржат состанок за да донесат одлука за видот на блокадата, односно дали граничниот премин ќе биде затворен два дена само за камиони или за сите возила.

Протестите на земјоделците траат над еден месец, започнаа на 30 ноември, а нивниот став е дека ќе дојдат на дијалог со Владата, само доколку бидат исполнети сите нивни барања.

За земјоделските протести, грчкиот премиер Кирјакос Мицотакис свика вонреден состанок.