Виолинистот Брајан Кинг Џозеф поднел тужба против ѕвездата до Вишиот суд на Калифорнија

Топ Вести - Слушај сега

Музичар го тужи Вил Смит (57) и неговата компанија „Трејбол студиос менаџмент“, за сексуално вознемирување, тврдејќи дека дошло до незаконит отказ и одмазда.

- Advertisement -

Професионалниот виолинист Брајан Кинг Џозеф поднел тужба до Вишиот суд на Калифорнија, округ Лос Анџелес, во вторник, на 30 декември, против ѕвездата на „Bad Boys“ и против „Трејбол Студиос Менаџмент“.

Во тужбата се тврди дека Смит „намерно го подготвувал г-дин Џозеф за понатамошно сексуално искористување“ откако го поканил да се придружи на неговата глобална турнеја, „Based on a True Story: 2025“, која траеше од јуни до септември 2025 година по објавувањето на неговиот албум во март.

Таму се опишува наводна „трауматска низа настани“ во март 2025 година, за време на турнејата на Смит, во која Џозеф тврди дека открил дека некој влегол во неговата хотелска соба во Лас Вегас без знаци на насилно влегување.

Во просторијата, наводно, имало рачно напишана порака со заканувачка содржина, со порака дека лицето ќе се врати, како и лични предмети што не му припаѓале, меѓу кои и шише со терапија за ХИВ на име на друго лице, болничка документација, обетка и други предмети.

Во тужбата се наведува дека Џозеф стравувал оти непознатото лице ќе се врати со намера да изврши сексуални дејствија врз него. Откако го пријавил случајот кај хотелскиот персонал, локалната полиција и менаџментот на турнејата, тој тврди дека бил посрамен од член на организацискиот тим и информиран дека е отпуштен. Набргу потоа, на неговото место бил ангажиран друг виолинист.

Адвокатот на Смит, Ален Б. Гродски, во изјава за магазинот „Пипл“ ги отфрлил сите обвинувања, оценувајќи ги како лажни, неосновани и непромислени и нагласил дека целосно ги негира и дека ќе бидат преземени сите законски чекори за да се утврди вистината.

Брајан Кинг Џозеф е музичар од Вашингтон кој во 2018 година учествувал во шоуто Америка има талент, каде што се пласирал меѓу тројцата најдобри финалисти. Во декември 2024 година тој на социјалните мрежи објавил видео од настап на сцена, наведувајќи дека станува збор за неговата прва вечер на турнеја со Смит.

Оваа тужба доаѓа по уште еден правен случај поврзан со семејството Смит. На почетокот на декември, поранешен соработник поднел тужба од три милиони долари против сопругата на актерот, Џејда Пинкет Смит, тврдејќи дека му упатила вербални закани. Извор близок до брачниот пар изјавил дека тие ги сметаат обвинувањата за целосно неосновани.