ТРАМП ГО ДОДАДЕ СВОЕТО ИМЕ НА КЕНЕДИЕВИОТ МЕМОРИЈАЛЕН ЦЕНТАР

Топ Вести - Слушај сега

Планираниот божиќен џез концерт беше откажан во Центарот Кенеди во Вашингтон, а организаторот тврди дека причината е одлуката да се додаде името на републиканскиот претседател на САД, Доналд Трамп, на таа културна институција.

- Advertisement -

– Одлучив да го откажам нашиот божиќен џез џем во Центарот Кенеди кога го видов променетото име минатиот петок – рече водителот на концертот, музичарот Чак Ред.

Ред кој е тапанар и вибрафонист и е главен изведувач на концертот од 2006 година, моментално нема планови да го промени датумот на настапот.

Управниот одбор на Центарот Кенеди минатата недела одлучи да го промени името на Меморијален центар за сценски уметности во „ Доналд Џ. Трамп и Џон Ф. Кенеди“, или скратено Центар Трамп Кенеди.

Одлуката предизвика негодување кај демократите и покрена прашања за легалноста на преименувањето на институцијата, која досега беше именувана во чест на убиениот американски претседател Џон Ф. Кенеди.

Американскиот претседател Доналд Трамп претходно ги отстрани членовите на одборот назначени од тогашниот претседател Џо Бајден и го назначи Ричард Гренел, долгогодишен сојузник и поранешен амбасадор во Германија, за претседател на центарот.

Ова не е прва промена што Трамп ја направи од почетокот на неговиот втор мандат. Во Белата куќа, Трамп ја искорна историската градина со рози и ја поплочи со бел камен, а багерите го срушија Источното крило за да направат место за огромна нова балска сала. За да ја прослави 250-годишнината од нацијата следната година, Трамп предвидува нова триумфална порта преку реката Потомак од Споменикот на Линколн. Тој ја облеа со злато и внатрешноста на Белата куќа.

Неговите критичари велат дека тој се обидел да ги компромитира традиционалните американски институции со назначување лојални луѓе и заканување со финансирањето. Трамп тврди дека се бори против она што тој го нарекува либерална пристрасност на тие институции.