Промовирана стратегијата за развој на информатичко-комуникациските технологии

Топ Вести - Слушај сега

Денеска не промовираме само еден стратешки документ, денеска ја потврдуваме нашата решителност да ја изградиме модерната, паметна и дигитална држава, што работи за граѓаните, држава што е транспарентна, ефикасна и правична, рече премиерот Христијан Мицкоски на промоцијата на Националната стратегија за развој на информатичко-комуникациски технологии – СМАРТ/МК 2030.

- Advertisement -

Оваа стратегија е визија, но и јасен план, посочи Мицкоски, таа е одговор на реалните предизвици со кои се соочува нашето општество и патоказ за тоа каква држава сакаме да бидеме во следната деценија.

– Дигиталната трансформација не е само воведување нови технологии. Таа е системски процес кој подразбира длабока промена во начинот на кој функционира државата, во културата на институциите и во односот кон граѓаните и кон бизнисите. Таа значи поедноставни и побрзи услуги, помалку бирократија, повеќе отчетност и поголемо учество на граѓаните во креирањето јавни политики. Како Влада, дигитализацијата ја поставивме како еден од нашите клучни стратешки приоритети. Затоа што знаеме дека дигиталната држава е предуслов за владеење на правото и ефикасна борба против корупцијата. Кога процесите се дигитални, трагата е видлива, а одговорноста е јасна. Кога системите се поврзани, нема простор за злоупотреби, селективност или привилегии – рече Мицкоски.

Стратегијата СМАРТ/МК 2030 го обликува патот на дигиталната трансформација на Република Македонија во согласност со нашите специфики, вредности и долгорочни државни интереси, додаде тој.

– Таа претставува детален и реален патоказ за надминување на развојните предизвици во областа на информатичко-комуникациските технологии и обезбедува забрзан дигитален развој во сите сектори – од јавната администрација, преку образованието и здравството, до економијата и локалниот развој – рече Мицкоски.

Овој документ се темели на принципите и насоките утврдени во Патоказот за дигитална трансформација и целосно е усогласен со Националната развојна стратегија 2024-2044, каде што развојот на човечкиот капитал и дигитализацијата на општеството се препознаени како централни двигатели на напредокот, додаде премиерот.

– Нема силна економија без дигитални вештини. Нема современо општество без дигитално писмени граѓани. И нема конкурентна држава без иновативен ИКТ-сектор – потенцира Мицкоски.

Посебна вредност на стратегијата, додаде тој, е тоа што таа прецизно ги адресира и краткорочните и среднорочните приоритети утврдени во Националната програма за усвојување на правото на ЕУ.

– Донесувањето на оваа стратегија, како и усогласувањето со европското законодавство во областа на електронските комуникации, дигитализацијата на институционалните регистри, воведувањето работа во облак, како и унапредувањето на правната рамка за електронска идентификација и за доверливи услуги, се јасен сигнал дека сме подготвени за европски дигитални стандарди – потенцира премиерот.

Но, додаде тој, стратегиите сами по себе не се доволни. Нашата обврска, потенцира Мицкоски, е оваа визија да ја претвориме во конкретни политики, мерливи резултати и реални промени во секојдневниот живот на граѓаните.

– Да изградиме држава во која услугите се достапни со еден клик, институциите комуницираат меѓусебно, а граѓанинот е во центарот на системот. СМАРТ/МК 2030 не е документ за една институција или за една влада. Таа е заедничка обврска – на институциите, приватниот сектор, академската заедница и на граѓанското општество. Само со партнерство, знаење и со доверба можеме да изградиме дигитална држава што ќе биде двигател на економскиот раст и гаранција за подобар квалитет на живот. Дозволете ми на крајот да упатам и искрена благодарност до министерот за дигитална трансформација, Стефан Андоновски, за неговиот посветен ангажман и визија во процесот на подготовка и обликување на стратегијата. Денес ја поставуваме основата. Нашата цел е јасна – паметна, дигитална и правична Македонија до 2030 година. Македонија што гледа напред, што инвестира во знаење, технологија и луѓе. Македонија што гради иднина, а не ја чека – рече премиерот Христијан Мицкоски во обраќањето.