Астрономите открија густа атмосфера околу карпеста планета

Топ Вести - Слушај сега

Астрономите открија густа атмосфера околу мала, карпеста планета што наликува на топка од жешка лава, сместена надвор од Сончевиот систем и на 280 светлосни години од Земјата, објавија медиумите денес.

- Advertisement -

Откритието, направено со помош на телескопот Џејмс Веб, ја доведува во прашање сегашната теорија дека релативно малите планети, кои се толку блиску до своите ѕвезди, не можат да имаат сопствена атмосфера.

Заклучоците на тим астрономи предводени од експерти од Американската институција Карнеги претставуваат најсилен доказ досега за постоење на атмосфера околу карпеста егзопланета.

Астрономите ги објавија своите наоди во Astrophysical Journal Letters. Планетата, наречена супер-Земја TOI-561 b, за прв пат е забележана во 2020 година и има дијаметар 1,4 пати поголем од оној на нашата планета.

Својата орбита ја завршува за помалку од 11 часа, што ја прави ретка класа на небесни тела познати како ултра-краткопериодни егзопланети, објавува Анса.

„Она што ја издвојува оваа планета е нејзината густина, што е аномалија. Таа е помалку густа од очекуваното, а составот на нејзината внатрешност не е доволен за да ја објасни оваа аномалија“, рече една од авторките на студијата, Јохана Теске.

Научниците ја измериле температурата на осветлената страна на планетата, која достигнува 1.800 степени Целзиусови, но сепак е пониска од очекуваната за гола карпеста планета.

Една од авторките на студијата, Анџали Пите од Универзитетот во Бирмингем во Англија, заклучила дека токму густата и нестабилна атмосфера околу оваа планета може да ги објасни сите наоди што ги направиле астрономите.