По серија масовни протести и притисок од јавноста, падна владата на Бугарија

По серија масовни протести и притисок од јавноста, падна владата на Бугарија. Со сериозен тон, во преполната собраниска сала, бугарскиот премиер Росен Желјазков изјави дека „владата поднесува оставка“.

– Ја слушаме волјата на народот. Демократијата е повик, а не привилегија.

Владата падна по шесттиот обид за изгласување недоверба, пишува Вести.

- Advertisement -

Одлуката следуваше по масовните протести што ги преплавија улиците на Софија и други градови. Илјадници демонстранти бараа заминување на владата, обвинувајќи ја за самоволие и ароганција.ж

Се смета дека протестите се најмасовните протести во последните две децении во земјата. На синоќешниот протест излегоа повеќе од 100.000 луѓе. Некои медиуми напишаа дека Генерацијата З го возвраќа ударот.

„Не го сфатија духот на промената“

Желјазков изјави дека коалицијата постигнала економска стабилност и влез во еврозоната, но призна дека дел од јавноста „не го разбрала духот на промените“.

Тој додаде дека „граѓанската енергија мора да се почитува“, бидејќи одлуките имаат смисла само ако ја одразуваат волјата на народот.

Инфлација и корупција

Шесттиот предлог за недоверба кон владата го поднесоа опозициските пратеници од коалицијата „Продолжуваме со промената – Демократска Бугарија“, со поддршка од помалите партии АПС и МЕЧ.

Тие тврдеа дека владата не успеала да се справи со инфлацијата и корупцијата во економијата.

Претходните пет гласања за недоверба, за екологија, надворешна политика, борба против корупција и фискална дисциплина, не успеаа.

По објавата на оставката, парламентарното гласање сепак се одржа, но без присуство на владејачките пратеници. Опозицијата собра 106 гласа, недоволни за да го урнат кабинетот по процедура. Второто гласање пропадна поради недостиг на кворум.

Техничка влада и можни предвремени избори

Оставката на Желјазков значи нова фаза за земјата. Претседателот најави консултации за формирање техничка влада и евентуални предвремени избори во 2026 година.

Политичките аналитичари сметаат дека ова е крај на една ера во која парламентот и улицата постојано се соочуваа.

Уапсени, качулки, боксирачи, пари, дрога

За време на вчерашниот протест во Софија, од страна на Софиската дирекција на внатрешни работи (СДВР) приведени се 57 лица со мерка задржување до 24 часа. Дополнително, покрената е истрага за дрога, а идентификувани се и 22 постари малолетници (до 18 години) и две малолетни лица (до 14 години), соопшти директорот на СДВР, главниот комесар Љубомир Николов.

Тој појасни дека пред почетокот на протестот, околу 40 лица биле изолирани, а кај нив се пронајдени забранети предмети како ножеви, т.н. „боксирачи“, маски и пиротехнички средства. Кај две лица се откриени и поголеми суми пари – 10.000 лева (околу 5.100 евра) и 1.500 евра.