Трочлено семејство од Босна и Херцеговина беше пронајдено мртво во семејната куќа во Чачак, Србија. Телата на таткото, мајката и нивниот 47-годишен син биле изнесени по увидот и пренесени на обдукција, која треба да го утврди точниот причинител на смртта.
Според првичните информации, родителите имале околу 75 години. До телото на синот бил пронајден нож, а сите три лица имале тешки повреди. Неофицијално, таткото и мајката имале посекотини на вратот, додека кај синот биле забележани убодни рани во пределот на градите.
Иако почетните сомнежи упатуваа на тројно убиство, сега сè повеќе докази сугерираат дека станува збор за двојно убиство и самоубиство. Засега нема индикации дека во куќата имало четврто лице.
Форензичарите со часови ја пребарувале куќата и секоја просторија, во која биле пронајдени телата со, како што наведуваат српските медиуми, „страотни рани“.
Соседите се шокирани од трагедијата.
– Тие дојдоа од Босна и Херцеговина, прекрасни, вредни и чесни луѓе. Не живееја тука постојано, а синот, колку што знаеме, живеел во странство. Никогаш немало проблеми со нив, ова е вистинска трагедија – изјавил еден сосед за агенцијата РИНА.
Друг жител од улицата вели дека ретко го гледале синот.
– Брачниот пар ги знаевме од видување, тивки и мирни луѓе. Синот поголемиот дел од времето го немаше. Ништо лошо никогаш не сме слушнале за нив – раскажува сосед.
Куќата, која семејството ја купило пред околу дваесет години, била обновена по оштетувањата во бомбардирањето во 1999 година. Жителите од улицата велат дека сè изгледало уредно, смирено и дека ништо не навестувало ваков исход.
Полицијата и понатаму ја обезбедува локацијата, а точните околности ќе бидат познати по завршување на истрагата.
