Необичен случај од Единбург ја збуни јавноста, откако крадец со електричен велосипед украл дрвен кип на војник висок повеќе од два метра пред еден коктел бар. На снимката се гледа како мажот со напор го крева кипот, го поставува преку велосипедот и со тешкотии се оддалечува. Сцената изгледа речиси како од празничен филм.
Сопственикот на барот, Пол Бакстон, изјави дека загубата е голема, не само поради вредноста, туку и поради симболиката.
– Украдениот кип се вика Нолан, а неговиот брат Нелсон е на безбедно. Двајцата беа дел од нашата божиќна декорација. За време на кражбата беше скршена и маса вредна неколку стотици фунти. Прилично катастрофално – истакна Бакстон.
Барот преку социјалните мрежи испрати апел:
„Ако крадецот го врати кипот, сè ќе биде во ред“.
Сепак, сопственикот не очекува Нолан да биде вратен. Вели дека најмногу го разочарало тоа што никој од минувачите не реагирал, иако сцената била очигледна и траела неколку минути.
Полицијата во Единбург потврди дека истрагата е во тек и дека се користат снимки од безбедносни камери за идентификација на сторителот.
