Најмалку 94 лица загинаа во катастрофалниот пожар што го зафати станбениот комплекс „Ванг Фук Корт“, а надлежните најавуваат дека операцијата за пребарување и спасување се ближи кон крај. Пожарот, кој избувна пред два дена, проголта дел од огромниот комплекс, а уште 279 жители се водат како исчезнати.
Огнот се проширил неверојатно брзо низ осумте висококатници во кои имало околу 2.000 станови и живееле повеќе од 4.600 луѓе. Комплексот бил во фаза на реновирање, а скелињата изработени од бамбус – материјал што традиционално се користи во градежништвото, дополнително ја поттикнале брзината на ширење на пламените јазици.
Полицијата веќе уапсила двајца директори и инженерски консултант од компанијата „Престиж констракшн“, која една година работела на обновата на комплексот. Се сомничи дека фирмата користела небезбедни материјали, меѓу кои и стиропор, што може да ја објасни драматичната експанзија на огнот.
– Имаме причина да веруваме дека одговорните компании биле крајно небрежни, што доведе до несреќата и му овозможи на пожарот неконтролирано да се шири – изјави началничката на полицијата, Ајлин Чунг.
Спасувачките екипи продолжуваат да пребаруваат низ остатоците од објектите, додека семејствата на исчезнатите со неверување ги чекаат последните информации.
