Имаме уште четири дена додека рафинеријата не биде целосно запрена доколку лиценцата не биде одобрена од ОФАК, или од американската влада, објави српскиот претседател Александар Вучиќ.
Вучиќ изјави дека рафинеријата НИС е во технолошки процес на топла циркулација, во еден вид тивка работа, дека сè уште не е затворена и исклучена и дека е во некаков систем со понизок работен режим.
Сè уште имаме време денес и утре да се обидеме да добиеме лиценца за работа, рече тој, додавајќи дека тоа зависи од Американците.
Тој рече дека Народната банка на Србија, како и сите комерцијални банки кои работат со НИС, добиле предупредување дека може да станат предмет на санкции. Со тоа ги ставаме во опасност и нашата централна банка и комерцијалните банки – ова значи дека може да има целосно запирање на платежните трансакции и услугите за населението, прекин на платежните картички, прекин на издавањето кредити и друго, рече тој.
Тој изјави дека добил усни гаранции од Американците дека нема да има такви санкции за Народната банка и комерцијалните банки. „И како што можете да видите, тој усен договор функционираше и сигурно ќе функционира денес и утре, така што нема закана до моментот кога САД ќе објават дали го отфрлиле или прифатиле“, изјави тој.
Да потсетиме дека, како што претходно објави порталот Н1, Рафинеријата Панчево го прекина производството, а постројките влегоа во таканаречената топла циркулација.
Од 9 октомври, американските санкции се применуваат врз НИС, поради нејзиното мнозинско руско сопствеништво.
