Европската Унија планира да воведе електронски пасош што патниците би можеле да го носат директно во својот телефон. Идејата е едноставна – побрзо преминување на границата, помалку задржување и поефикасна контрола на патниците.
Како што објавува германскиот „Билд“, земјите-членки се согласија за заеднички став, што отвора пат за усвојување на посебна регулатива за дигитални пасоши, но пред дигиталниот пасош да стане реалност, се очекува Советот на ЕУ и Европскиот парламент да се согласат за конечниот текст на регулативата. Дури тогаш ќе започне техничката имплементација и фазата на тестирање.
Според најавеното, дигиталната верзија на патната исправа нема да го замени постоечкиот документ. Физичкиот пасош останува задолжителен, а електронскиот се воведува само како дополнителна опција за оние кои сакаат побрзи процедури.
Преку апликацијата „EU-Travel“, патникот ќе може да ја чува официјално заверената дигитална верзија на пасошот, заедно со биометриските податоци што се содржани и во физичкиот документ – фотографија и отпечатоци од прсти.
Клучната предност на апликацијата ќе биде можноста за испраќање податоци до граничните служби однапред, пред да пристигнат на преминот. Ова би требало значително да го забрза инспекцијата и да ги намали редиците.
Техничкиот развој го води агенцијата EU LISA, позната по управувањето со главните европски ИТ системи, вклучувајќи го Информативниот систем за визи (VIS) и Системот за влез/излез (EES). Новата апликација ќе биде директно поврзана со овие платформи, како и со идниот систем ETIAS, кој ќе важи за патници од земји на кои не им е потребна виза.
Иако проектот е најавуван како голем чекор кон модернизација, организациите за човекови права предупредуваат на потенцијални ризици. Особено загрижува планираната употреба на автоматско препознавање на лица, што, според критичарите, може да отвори простор за проширување на биометрискиот надзор.
