Околу илјада домови и повеќе од 1.500 хектари земјоделско земјиште се поплавени по катастрофалните дождови што ја погодија Албанија

Околу илјада домови и повеќе од 1.500 хектари земјоделско земјиште се поплавени по катастрофалните дождови што ја погодија Албанија. Стотина семејства се евакуирани, десетици мостови се оштетени. Еден човек загина во село кај Девол.

Министерот за одбрана, Пиро Венгу, од Мобилниот центар за цивилни вонредни состојби соопшти дека најголеми штети претрпеа регионите Лежа, Пешкопеја, Фиер, Берат, Корча, Ѓирокастро и Валона. Високите речни текови и силните врнежи предизвикаа хаос на терен, каде што екипите работат без престан.

Во Лежа се поплавени 600 домови, во Корча 300, во Валона 52, а во Фиер 25 домови. Поради опасност од надојдени води, привремено се евакуирани 52 семејства во Валона, 18 во Корча и уште неколку семејства во останатите погодени општини.

- Advertisement -

Оштетени се речиси 20 мостови – дел од нив ќе треба да се градат од почеток. Најкритична е состојбата на каскадата на Дрим, каде што се наоѓаат најголемите хидроелектрани во земјата, а од правилното управување зависи избегнување на нови поплави, особено во регионот на Скадар.

Албанската армија е активно вклучена во спасувачките операции, евакуација на населението, дистрибуција на храна и зајакнување на насипите и браните. Ситуацијата останува нестабилна, а властите предупредуваат дека ризикот не е поминат.