Романија, земја-членка на НАТО што се граничи со Украина, активираше борбени авиони рано утрово како одговор на новиот упад со беспилотни летала на нејзина територија, соопшти Министерството за одбрана.
Два германски борбени авиони што дејствуваат во Романија ја следеа ситуацијата во воздухот од полноќ на границата со Украина, по руските напади, соопшти романското Министерство за одбрана.
Сигнал од беспилотно летало беше откриен во рок од неколку минути, влегувајќи на околу осум километри во романскиот воздушен простор пред да исчезне од радарот, додаде министерството, прецизирајќи дека е испратено телефонско предупредување до жителите на округот Тулча на југоистокот на земјата.
Дронот се појавувал повремено на радарот околу 12 минути по руските воздушни напади во близина на границата на Романија со Украина, се вели во соопштението, додавајќи дека не е откриен удар на земја.
„Мобилизирани се уште два авиони Ф-16 на романските воздухопловни сили“, додаде министерството.
Предупредување е испратено и до жителите на округот Галац, во југоисточна Романија.
Од почетокот на руската инвазија на Украина во 2022 година, Романија регистрирала неколку повреди на својот воздушен простор, кога делови од дрон паднале на нејзина територија.
Во понеделник, Романија нареди евакуација на две села, прв пат поради војната во Украина, кога руски напад со беспилотни летала од другата страна на Дунав предизвика пожар на брод што превезувал течен природен гас. Наредбата за евакуација беше укината вчера.
