Русија е подготвена да ги продолжи мировните преговори со Украина во Истанбул

Русија е подготвена да ги продолжи мировните преговори со Украина во Истанбул, објави денеска руската државна новинска агенција ТАСС, повикувајќи се на официјален претставник на Министерството за надворешни работи.

Не се одржале директни разговори помеѓу двете страни од нивниот состанок во Истанбул на 23 јули.

ТАСС го цитираше официјалниот претставник на руското МНР, Алексеј Полишчук, кој изјави дека турската страна повторно упатува повици за продолжување на мировните преговори.

- Advertisement -

– Рускиот тим е подготвен за тоа, топката сега е на страната на Украина – рече тој.

Украина ги одбива тврдењата на Кремљ дека е виновна за запирањето на мировниот процес, додека конфликтот се приближува кон крајот на својата четврта година.

На состанокот на 23 јули, кој траеше само 40 минути, украинската страна предложи состанок во август меѓу претседателот Володимир Зеленски и рускиот претседател Владимир Путин. Кремљ потоа објави дека Путин е подготвен за таква средба, но само ако се одржи во Москва, што Киев го отфрли.

Во меѓувреме, унгарскиот премиер Виктор Орбан изјави дека средбата меѓу американскиот претседател Доналд Трамп и рускиот претседател Владимир Путин во Будимпешта сè уште е на дневен ред, и оти разговорите меѓу руската и американската делегација моментално се во застој по прашањето на украинските територии.