Украина се соочува со влошување на недостигот на војници, бидејќи рекорден број мажи ја напуштаат земјата за Европа, предупреди градоначалникот на Киев, Виталиј Кличко, во интервју за мрежата на глобални репортери „Аксел Спрингер“.
„Имаме огромни проблеми со војниците, со човечките ресурси“, рече Кличко, признавајќи дека речиси четири години војна сериозно ја намалиле способноста на Украина да ги пополни своите редови.
Тој ги опиша руските трупи како немилосрдни во нивните напади: „Тоа е како компјутерска игра, тие само продолжуваат, не им е гајле за мртвите војници“.
Според сегашните правила, Украинците можат да бидат мобилизирани од 25-годишна возраст, но Кличко верува дека ова ограничување треба да се намали. „Порано, 18-годишниците служеа во војска, но тие се деца“, рече тој. „Моментално, во Украина, можете да бидете регрутирани само од 25-годишна возраст. Таа возраст може да се намали за една или две години – на 23 или 22“.
Неговите коментари одразуваат растечка загриженост за егзодусот на млади мажи. Одлуката на владата во август, со која им беше дозволено на мажите на возраст од 18 до 22 години да ја напуштат земјата, се совпадна со нагло зголемување на бројот на Украинци кои бараат заштита во земјите од Европската Унија.
Најновите податоци покажуваат дека земјите од ЕУ доделиле повеќе од 79.000 нови одлуки за привремена заштита на Украинци во септември, што е највисока месечна бројка за две години, а најголеми зголемувања се регистрирани во Германија и Полска, според Политико.
Кличко предупреди дека јазот помеѓу човечките ресурси на Украина и бројната супериорност на Русија станува сè поизразен. „Тие (Русите) имаат наредби и напредуваат“, рече тој. „Успешно ја браниме нашата земја речиси четири години, но е тешко. Храброста за борба е сè уште присутна и тоа е најважното нешто.“
Со оглед на тоа што милиони Украинци сега се во странство, градоначалникот на Киев нагласи дека иднината на земјата зависи од враќањето на младите луѓе по војната. „Би биле среќни ако половина од младите се вратат“, рече тој. „Но, за тоа ни треба мир, работни места и квалитетен живот. По војната, нè чека огромен предизвик“.
