Португалската фудбалска ѕвезда Кристијано Роналдо официјално потврди дека Светското првенство во 2026 година ќе биде неговото последно настапување на најголемата фудбалска сцена. Легендарниот напаѓач истакна дека ќе продолжи да игра уште една или две години на професионално ниво, пред конечно да се повлече од фудбалот.
– Да, дефинитивно. Ќе имам 41 година и мислам дека тоа ќе биде вистинскиот момент – изјави Роналдо на видеоконференција за време на туристички форум во Ријад.
Со повеќе од 950 постигнати голови на клупско и репрезентативно ниво, Роналдо е еден од најуспешните фудбалери во историјата. Тој дебитираше како тинејџер во Спортинг Лисабон во 2002 година, а својата кариера ја изгради преку настапи за Манчестер Јунајтед, Реал Мадрид, Јувентус и во моментов за Ал-Наср во Саудиска Арабија.
Роналдо во јуни го продолжи договорот со Ал-Наср до 2027 година и се стреми да ја освои единствената голема титула што недостасува во неговата колекција – Светското првенство. Следниот мундијал ќе се одржи во САД, Канада и Мексико.
– Во моментов навистина уживам. Постигнувам голови, се чувствувам брз и остар. Но да бидеме искрени, кога велам „наскоро“, мислам на една или две години – додаде Роналдо, најавувајќи дека по завршувањето на активната кариера ќе сака да посвети повеќе време на своето семејство.
