Пријава за екс-директор на струмички Комуналец

Поранешен директор на Јавното претпријатие Комуналец од Струмица го оштетил буџетот на претпријатието за околу 14.030 евра, доделувајќи си додатоци на плата за себе и за повеќе вработени лица, јави МВР.

Според полициските информации, пријавениот, З.Г. (57) од Струмица, во периодот од август 2020 до 2024 година, без законска основа и спротивно на внатрешниот правилник за плати, донесувал решенија за додаток на плата од 9.000 и 6.000 денари месечно. На тој начин се стекнал со противправна имотна корист од 552.520 денари, што изнесува приближно 8.970 евра.

Понатаму, во септември и октомври 2021 година, тој донел уште седум идентични решенија за седум други вработени во претпријатието. Секој од нив добивал по 6.000 денари месечно до март 2022 година, со што се стекнале со противправна корист од 276.000 денари. За едно лице, директорот одобрил посебен додаток „поради прилагодување кон пазарот на трудот“, во износ од 36.000 денари.

- Advertisement -

Секторот за внатрешни работи Струмица поднел кривична пријава до Основното јавно обвинителство поради сомнение за сторено кривично дело „злоупотреба на службената положба и овластување“.