Кинеските рафинерии за нафта ги избегнуваат испораките од Русија откако САД и други земји ги ставија на црната листа водечките руски производители на „црно злато“, како и некои од купувачите на овој енергетски производ, пишува Блумберг.
Неименувани трговци со нафта, за медиумот изјавиле дека кинеските државни гиганти како „Синопек“ и „Петрокина“ сега се држат настрана и ги откажуваат некои од своите руски испораки откако американските санкции против „Роснефт“ и „Лукоил“ беа воведени минатиот месец.
Помалите приватни рафинерии, за кои американската агенција вели дека се нарекуваат „чајници“, исто така се воздржуваат од купување руска нафта бидејќи се плашат од казни слични на оние со кои се соочува „Шандонг Јулонг Петрохемикал“, кинеска компанија која неодамна беше ставена на црната листа од Велика Британија и Европската Унија.
Меѓу руските енергетски производи погодени од овој развој на настаните е широко популарната сурова нафта со ниска содржина на сулфур ESPO што доаѓа од Источен Сибир, чии цени сега паднаа.
Консалтинг компанијата „Рајстад Енерџи АС“ проценува дека околу 400.000 барели дневно, што е дури 45% од вкупниот увоз на руска нафта во Кина, се погодени од новата одлука на купувачите.
Блумберг објави дека Русија се позиционирала како најголем странски снабдувач на Кина, делумно затоа што цената на нејзината нафта е значително намалена поради санкциите воведени од други земји по инвазијата на Москва во Украина.
САД и нивните сојузници сега ги заоструваат санкциите, како кон руските производители, така и кон нивните купувачи, во обид да ја запрат војната со задушување на приходите од нафта на Кремљ.
Кина е најголемиот светски увозник на сурова нафта и сите ограничувања на снабдувањето од нејзиниот западен сосед веројатно ќе им користат на другите добавувачи.
Меѓу нив би можеле да бидат САД, кои се согласија за значајно трговско примирје со Пекинг на минатонеделната средба меѓу претседателот Доналд Трамп и Си Џинпинг на маргините на самитот на АПЕК во Јужна Кореја.
Сепак, санкциите не се целосен губиток за Москва.„Шандонг Џулонг Петрохемикал“, кинеска компанија на црната листа чии испораки беа намалени од западните добавувачи, во голема мера се сврте кон руската нафта поради недостаток на други опции.
„Рајстад“ наведува дека, во меѓувреме, другите приватни рафинерии во Кина ги следат случувањата и се воздржуваат од активности што би можеле да предизвикаат слични санкции.
Во секој случај, тие помали рафинерии познати како „чајници“ се соочуваат со недостиг на квоти за увоз на сурова нафта, што веројатно ќе ги попречи нивните купувања на руска енергија до крајот на годината, дури и ако беа подготвени да ги игнорираат санкциите.
