Обилни дождови го погодија Њујорк на 30 октомври, оставајќи зад себе две човечки жртви, поплавени улици и стотици откажани летови. Градоначалникот Ерик Адамс соопшти дека бурата урнала повеќедецениски рекорди и предупреди дека екстремните временски услови стануваат „нова реалност“ за градот.
Националната метеоролошка служба извести дека во само десетина минути во некои делови на градот паднал дожд колку што вообичаено паѓа за неколку часа. Во Централ Парк беа измерени 4,7 сантиметри врнежи, на аеродромот Ла Гвардија 5,3 сантиметри, а на Њуарк Либерти во Њу Џерси 5 сантиметри. Тоа се рекордни количини за октомври.
Две лица загинаа во поплавите. Според локалните медиуми, едниот маж бил пронајден во поплавен подрум во Бруклин, каде се обидувал да го спаси своето куче, додека другата жртва е пронајдена во котларница во населбата Вашингтон Хајтс. Властите предупредија дека престојот во подземни простории при вакви врнежи претставува сериозен ризик.
Поплавите предизвикаа хаос во сообраќајот. Дел од автопатите и градските улици беа непроодни, јавниот превоз доцнеше, а некои метро линии беа прекинати поради навлезена вода. Аеродромите ЏФК, Ла Гвардија и Њуарк воведоа таканаречени „ground stops“, при што беа откажани и одложени стотици летови низ источниот брег на САД.
– Оваа бура ги урна рекордите за врнежи од дожд за 30 октомври. Поголемиот дел од дождот што беше најавен дека ќе врне неколку часа, падна за само десет минути – напиша Адамс на платформата X, повикувајќи ги граѓаните на претпазливост и следење на упатствата од службите.
Националната метеоролошка служба издаде предупредувања за крајбрежни поплави во делови од Бронкс, Бруклин и Квинс, а ветерот дополнително ја влоши ситуацијата, достигнувајќи брзини и до 50 милји на час. Спасувачките тимови интервенираа на десетици локации, каде автомобили и пешаци беа заглавени во надојдената вода.
Иако дождовите престанаа до вечерта, властите предупредуваат дека почвата е заситена, а нивото на реките може дополнително да порасне во наредните денови. Експертите веќе ја поврзуваат оваа бура со пошироките климатски промени, кои носат сѐ почести и поинтензивни екстремни врнежи во регионот на североисточните делови на САД.
