Двајца полицајци добија кривични пријави за грабежот во златарница во Гостивар, соопшти МВР.
„Министерството за внатрешни работи до Основното јавно обвинителство Гостивар поднесе кривична пријава против две лица поради сомнение дека како соизвршители учествувале во извршување на кривично дело разбојништво, по член 237 став 4 во врска со став 1 од Кривичниот законик. Осомничените се лишени од слобода во текот на вчерашниот ден. Тие на 10.10.2025 година, заедно со други засега непознати лица, влегле во златарница во Гостивар и со сила и закана со огнено оружје одзеле 18 килограми злато. Двајцата осомничени се полициски службеници од ОВР Кичево, кои се договориле и направиле план за грабежот заедно со другите лица за кои интензивно се преземаат дејствија за пронаоѓање“, соопшти МВР.
Осомничените учествувале во подготовките со извиди на локацијата и на работата на златарницата два дена пред грабежот, се додава во соопштението.
„На самиот ден, тие со службено возило на МВР го обезбедувале патот на двете возила искористени за грабежот во Гостивар, од кои едното потоа е пронајдено запалено на магистралниот пат Гостивар-Дебар, додека другото е пронајдено напуштено во Кичево, во близина на сточниот пазар. МВР во координација со ОЈО Гостивар презема мерки и активности за целосно расчистување на случајот“, соопшти полицијата.
