Црногорскиот претседател Јаков Милатовиќ остро го осуди нападот што се случи во Подгорица, изразувајќи поддршка за повредениот граѓанин и неговото семејство и ги повика надлежните органи брзо и целосно да го расветлат случајот и навремено да ја информираат јавноста.
Премиерот Милојко Спајиќ објави дека Владата денес, по итна постапка, ќе донесе одлука за привремено укинување на безвизниот режим за турските граѓани, откако полицијата приведе 45 турски државјани за неколку инциденти со насилство во претходните 24 часа.
Полицијата во Подгорица ги уапси азербејџанскиот државјанин Ј.Г. (31) и турскиот државјанин Н.Д. (54), осомничени дека пред две ноќи му нанеле повреди на М.Ј. во подгоричката населба Забјело.
Тие се осомничени за кривично дело насилно однесување.
Ова предизвика негодување кај граѓаните кои се собраа и скандираа „Убијте го Турчинот“ синоќа.
Полицијата спроведе рации во Подгорица синоќа. Полицијата објави дека во последните 24 часа имало неколку инциденти на насилство во кои биле вклучени турски државјани кои привремено престојуваат во Подгорица, и дека околу 45 турски државјани се приведени.
Порано вчера, полицијата објави дека околу 13.300 турски државјани официјално престојуваат во Црна Гора.
Милатовиќ апелираше на смиреност и воздржаност, велејќи дека во општеството не смее да има место за колективна вина или стигматизација на целата нација.
„Имаме обврска да ја заштитиме безбедноста на луѓето и јавниот ред, но и социјалната кохезија. Сите јавни актери мора да внимаваат да не креваат тензии со своите пораки, додека полицијата и обвинителството се должни решително да го потиснат говорот на омраза и секаков вид закани“, рече претседателот.
Зборувајќи за прашањето за миграцијата, Милатовиќ оцени дека на Црна Гора ѝ е потребна поодговорна имиграциска политика – цврста против злоупотребите и криминалот, и фер кон сите кои го почитуваат законот.
„Ова значи насочени безбедносни проверки, ефикасно санкционирање на незаконитостите и посилен надзор над злоупотребите, но и јасна порака дека луѓето кои живеат и работат во согласност со прописите се наши гости и соседи – добредојдени и безбедни“, нагласи тој.
Претседателот потсети дека пред еден месец предупредил за потребата од дефинирање јасна, избалансирана и одговорна политика во областа на миграцијата, додавајќи дека оттогаш немало конкретни институционални чекори.
„Денес, наместо избрзани одлуки, мора да се преземат сериозни и одржливи мерки во интерес на сите граѓани“, заклучи Милатовиќ, велејќи дека Црна Гора мора да покаже зрелост: нулта толеранција кон сторителите, доследна примена на законот за странци и смирен пристап во време кога е најлесно да се креваат тензиите“, заклучи Милатовиќ
Ибрахимовиќ повика на разумност
Вицепремиерот и министер за надворешни работи на Црна Гора, Ервин Ибрахимовиќ, се огласи откако жител на Подгорица беше избоден со нож, што доведе до инциденти во подгоричката населба Забјело.
„Остро го осудувам синоќешниот гнасен напад во Подгорица во кој беше повредено едно лице, како и секоја друга форма на насилство, и ги повикувам властите што е можно поскоро да ги пронајдат и гонат сторителите и да им обезбедат на граѓаните безбедна средина. Во исто време, ги повикувам сите во Црна Гора на воздржаност и разумност“, рече Ибрахимовиќ.
Како што додаде, вината е индивидуална, овластувањето за спроведување на законот е само на државата, а идентификувањето на која било нација и држава со кој било чин на насилство е чекор во погрешна насока.
„Во европска Црна Гора нема место за насилство, нема место за автократија и нема место за извиците „Убијте го Турчинот!“ што можеа да се слушнат во Подгорица, па затоа ги повикувам властите и во овој случај да реагираат брзо“, рече Ибрахимовиќ.
