Украински функционери: Двајца загинати во руски напад со беспилотни летала и ракети врз Киев

Најмалку две лица загинаа, а уште две се повредени во руски напад со ракети и беспилотни летала врз Киев во текот на ноќта, изјави преку Телеграм шефот на локалната воена администрација, Тимур Ткаченко.

Ткаченко рече дека најмалку едно лице загинало во областа Дњепровски во Киев, каде што избувнал пожар на осмиот и деветтиот кат од станбена зграда.

Градоначалникот на Киев, Виталиј Кличко, рече дека нападите со беспилотни летала ги погодиле областите Дњепровски и Дарницки, а штети се пријавени и во областите Печерски и Десњански.

- Advertisement -

Воздушен напад беше извршен и во текот на ноќта во јужниот украински регион Запорожје, при што беа повредени најмалку девет лица, соопштија украинските служби за итни случаи.

Украинската министерка за енергетика, Свитлана Гринчук, изјави дека утрово е извршен масовен напад врз енергетската инфраструктура на земјата.

Украинскиот претседател Володимир Зеленски, кој се обидува да ја зајакне позицијата на Украина со барање ракети „Томахавк“ со долг дострел од Соединетите Американски Држави, утрово напиша на мрежата X дека поминала уште една ноќ што докажала дека Русија не чувствува доволно силен притисок за да ги запре нападите.

Тој рече дека синоќа биле погодени бројни украински градови, дека главната цел била енергетската инфраструктура, но дека биле погодени и бројни станбени згради.

Од почетокот на својата офанзива пред три и пол години, Русија речиси секојдневно лансира беспилотни летала и ракети во Украина, која редовно одговара со напади на руска територија, поточно насочени кон руската енергетска инфраструктура.