Полска го предупреди рускиот претседател Владимир Путин да не лета над нејзиниот воздушен простор на пат кон самитот во Унгарија со американскиот претседател Доналд Трамп, велејќи дека во спротивно би можела да биде принудена да ја изврши меѓународната потерница издадена против него.
Трамп минатата недела изјави дека планира да се сретне со Путин во Будимпешта како дел од неговите напори да посредува за завршување на војната во Украина.
Меѓународниот кривичен суд (МКС) со седиште во Хаг издаде потерница за Путин во 2023 година, обвинувајќи го за воено злосторство за нелегално депортирање на стотици деца од Украина. Русија не ја признава надлежноста на судот и ги отфрла обвиненијата.
„Не можам да гарантирам дека независен полски суд нема да ѝ наложи на владата да приземји таков авион и да го предаде осомничениот на судот во Хаг“, изјави полскиот министер за надворешни работи Радослав Сикорски за Радио Роджина, според Ројтерс.
„Тие ќе мора да користат друг пат“
Наредбата на МКС ги обврзува сите земји-членки на судот да го уапсат Путин ако биде пронајден на нивна територија.
„Мислам дека руската страна е свесна за ова. Затоа, ако овој самит навистина се одржи, и се надевам со учество на жртвата на агресијата, авионот ќе мора да користи друга рута“, додаде Сикорски.
Унгарија, чиј премиер Виктор Орбан одржува блиски односи со Русија, изјави дека ќе обезбеди влез на Путин во земјата и враќање дома по самитот.
За да избегне летање над Украина, руската делегација ќе мора да помине низ воздушниот простор на најмалку една земја од Европската Унија. Сите членки на ЕУ се членки на Меѓународниот кривичен суд, иако Унгарија е во процес на повлекување од него.
Полска, членка на НАТО, е меѓу најлојалните сојузници на Киев откако Русија започна целосна инвазија на Украина во 2022 година.
